Ra lata Poi Daw 2 Hta Myen Hpyen Dap A USDP (ကြံ့ခိုင်ရေး) Party Gaw Ginra 60 Daram Hta Awng Dang Lam Lu Ai Lam

Pajau Media

12 January 2026

Myen Hpyen Dap woi awn galaw ai ra lata poi Daw 2 hpe ginra 100 daram hta galaw ai kaw na ginra 60 daram gaw USDP (ကြံ့ခိုင်ရေး) Party kawn awng dang ai lam myen mungdan shiga ni hkan tsun da ai kaw na chye lu ai.

January 11 ya shani myen mungdan ginra 100 hta galaw ai ra lata poi hta ginra 60 daram kaw myen hpyen dap Party ni awng dang ai lam, Jinghpaw Mung Waimaw Ginra kata ra lata poi galaw na shara 29 hpaw nna ra lata poi hpe simsa ai hku galaw nga ma ai lam Jinghpaw Mung asuya shiga laika man ni hta mung tang madun da ai re hpe chye lu ai.

Myen hpyen dap gaw ra lata poi daw lahkawng hpe Jinghpaw Mung Machyang Baw, Mogawng Ginra hte Waimaw Ginra ni hkan sha n-ga Myen Mungdan ting ginra 100 daram hta ra lata poi galaw sai re .

Gumshem ai Myen Hpyen Dap gaw ra lata poi daw 3 hpe mung January 25 ya hta galaw na rai nna ginra 63 hta galaw na re lam, ra lata poi n lu galaw ai ginra 65 mung nga ai lam Myen Hpyen Dap n dau da ai kaw na chye lu ai.

Shiga – Htu Seng