Ra Lata Poi Hta Jai Lang Na Sindan Pa Bang Ai Hpan Jak Hpe N Teng N Man Ai Re Nga Tsun Ai Ni Hpe Ahkyak La Sa Wa Na Lam

Pajau Media

October 7, 2025

Myen hpyen dap gaw Ra lata poi lamang a matu galaw da ai Electronic Jak hte Sindan Pa bang ai lam hpe n teng n man ai, Sindan Pa masu ai nga nna tsun dinglun lam, Ganghkau shiga ni hkan ka mara ai ni hpe kalang ta ahkyak la rim na re lam Ra lata poi commission kawn seng ang ai rung ni de matsun da ai lam chye lu ai.

Du wa na December 28 ya hta galaw na Ra lata poi hta Myen mungdan ting madang hku nna Electronic Jak hpe Jai lang nna Sindan Pa bang na re hte Jak yawm htum Mun manga daram jai lang sa wa na re lam chye lu ai.

Electronic Jak hpe Myen hpyen dap kawn madung lit la galaw shapraw ai rai nna dai jak ni hte Sindan Pa masu magaw ai lam n mai galaw ai majaw n dai Ra lata poi hta mara sha gun tsun shaga ai ni hpe sawk sagawn nna ahkyak la sa wa na lam tsun da ai re.

Ra lata poi laman masat da ai Jak ni hta Sindan Pa bang ai shaloi mung tinang lata da ai Rap Daw Salang a mying hte masat dingsat n re ai sha shut shai wa yang dai hpe tsun n dau wa ai shaloi n hkap la nna shawk shawn ai wa hpe htawng dam 3 ning shing nrai gumhpraw dam Sen 3 masat jahkrat na re lam Ra lata poi Upade hta tang madun da ai re.

Myen hpyen dap gaw du wa na December 28 ya shani galaw na myen mungdan ting madang Ra lata poi hta Electronic Jak hpe madung jai lang na re majaw n teng n man ai lam gaw n nga na re nga nna tsun da ai .

Shiga – Hpring