Ra Lata Poi Hta Sindan Pa N Bang N Mai Hku Nna Atik Anang Jahkrit Shama Ai Lam Galaw Wa Yang NUG Asuya De Mai Shawk Ai Lam

Pajau Media

November 7, 2025

Myen Mungdan ting madang hku galaw na Ra lata poi hta Mung masha ni hpe Sindan Pa n bang n mai hku nna atik anang jahkrit shama tsun wa ai lam ni galaw wa yang NUG asuya hpang de shawk wa mai ai lam November 6 ya shani NUG asuya n dau da ai re hpe chye lu ai.

Atik Anang jahkrit shama nna Sindan Pa bang na matu tsun wa ai gaw shinggyim ahkaw ahkang tawt lai ai lam langai mung re hte Ra lata poi hte seng ai Upade hpe tawt lai ai lam mung re nga nna NUG asuya tsun da ai hte Ra lata poi hta Sindan Pa bang na lam, tau hkrau Sindan Pa bang ai lam ni hpe atik anang tsun shadut wa ai ni hpe Upade hte hkrak tang du hkra ahkyak la ai lam galaw na re nga nna NUG asuya tsun da ai re.

Ya aten Ra lata poi shang shingjawng na Dat Kasa Salang ni gaw Ra lata poi galaw na matu Mung masha Myit gang, hkan saw shaga ai lam ni galaw nga ai aten mung re ai hta maga mi de mung Ra lata poi hte seng nna Myen hpyen dap woi galaw ai lam ni hpe tsun jahpyak tsun shaga ai lam, gang hkau ntsa Facebook laika man hkan ninghkap ai kumla madun ai masha ni hpe Myen hpyen dap kawn ja ja rim ahkyak la ai lam ni mung galaw nga ai hpe mu lu ai.

Ra lata poi hte seng nna Myen hpyen dap galaw ai lam ni hpe tsun dinglun ai ni hpe rim ahkyak la nna htawng bang ai lam ni galaw ai hta Myen mungdan kata na shingni bungli galaw ai sumla hkrung shayi shadang ni mung lawm ai rai nna ya aten rim ahkyak la hkrum ai masha marai 90 jan du wa sai lam mung chye lu ai.

Shiga – Pyilan U