Ra Lata Poi N Byin Hkra Dingbai Dingna Jaw, N-gun Madun Ai Lam Shabyin Ai Nga Nna Rim Hkrum Ai Marai 12 Du Hkra Nga Wa Ai Lam

Pajau Media

September 30, 2025

Ra lata poi kaw shang shingjawng na Party 4 dawm jahkring hkrum nna ra lata poi masing n byin hkra tsun shadut n-gun madun ai ni hpe Ra lata poi makawp maga Upade hte ahkyak la rim hkrum ai masha marai 12 du hkra nga wa sai lam chye lu ai.

Myen hpyen dap woi awn galaw na Ra lata poi hta Mung masa hpung Party 10 kaw nna Party 4 hpe party rung gawk ni masat da ai ninggam n hpring zup ai ngu ai gabaw hte jahkring kau ai lam chye lu ai.

Ra lata poi n byin hkra ganghkau laika man hkan, Mung masha law law nga ai shara hkan hkaw tsun ai lam, n-gun madun ai lam, laika, sumla ni, Poster ni shakap ai lam ni hpe Ra lata poi makawp maga Upade hte rau ahkyak la sa wa na re lam chye lu ai.

Ra lata poi makawp maga Upade Pukma 23(က)hte dingbai dingla jaw ai kadai hpe raitim htawng dam 3ning kaw na 7ning du hkra hkrat mai ai sha n-ga gumhpraw dam ni jahkrat mai ai lam tsun da ai re.

Myen hpyen dap gaw Ra lata poi galaw na matu hkyen shajin nga ai sha n-ga party Democrecy Ra lata poi n byin hkra dingbai dingna jaw ai ni hpe ahkyak la mai ai Upade hpe lai wa sai July shata kaw shagrin dat ai re hpe chye lu ai.

Shiga - Hpring