Ra Lata Poi Ni Wa Ai Hte Maren Putao Ginra Kata Myen Hpyen Dap N-Gun Jat Nga Dingyang Re Lam

Pajau Media

December 12, 2025

Myen hpyen dap woi galaw mat na ra lata poi ni wa ai hte maren Putao Machang Baw ginra hte Hkawng Lang Hpu ginra de myen hpyen dap gaw n-gun kaba hte htu shadut ai lam, nbungli bawm gasat ai lam grau galaw wa ai nga nna ginra masha ni tsun ai re.

Putao Myikyina lam mayan rai nga ai Tan Ja mare sinpraw maga hte Mali Hka mayan shara ni hkan n dai laman lahkawng maga gasat gala majan jahkring hkring byin ai rai nna nbungli bawm jahkrat bun ai lam shani shagu galaw nga ai re hpe chye lu ai.

Tan Ja mare a sinpraw maga N Hkaw Hka mayan Myen hpyen dap P.T.Ts pawng hpawm hpung ni htu shadut wa ai majaw gasat gala jahkring hkring byin ai rai nna nbungli gap garum ai lam matut manoi galaw nga ai re hpe chye lu ai.

Lung Sha Yang, Tan Ja mare maga de Myen hpyen dap gaw ra lata poi a matu hkyen lajang ai lam ni nga ai re sha n-ga rawt malan hpung ni maga mung jahkring hkring shang gasat ai lam ni nga ai majaw Myen hpyen dap pawng hpawm hpung ni gaw ra lata poi hpe makawp maga ai masing hte hpyen n-gun jat ai lam nbungli gap gasat ai lam galaw nga ai re nga nna ginra masha tsun maram nga ma ai re.

Shiga – Mali Hku