Ra Lata Poi Ninghkap N-gun Madun Ai Lam

Pajau Media

September 9, 2025

Myen hpyen dap gaw du wa na December shata hta Myen mungdan ting ra lata poi galaw na matu hkyen nga ai hta Jinghpaw Mung kata ginra yawng ngu na daram ra lata poi galaw lu na matu grai hkyen shajin nga ma ai re.

Ya aten Jinghpaw Mung kata Hpakant, Manmaw, Waimaw ginra ni hta gaw majan laja nga ai re hte dai ginra hkan mung ra lata poi galaw lu hkra ya aten hpyen n-gun kaba hte htu shadut htim gasat la na matu galaw nga ai re.

 Myen hpyen dap woi awn galaw na ra lata poi hpe n ra sharawng ninghkap ai hku nna Hpakant ginra Mung masha ni gaw September 9 ya shani hta n-gun madun ai lam ni galaw ai re hpe chye lu ai. N-gun madun lamang hpe Hpakant Gwi Hka, Lawng Hkang, Hpakant hte Seng Tawng ginra ni hta galaw ai re hpe mung chye lu ai.

Tara n shang ai ra lata poi hpe ninghkap ai lam, myen hpyen dap tsun ai democracy maga de galai sa wa na ngu ai gaw kam shara n nga ai, Mung masha hpe dip up nga ai myen hpyen dap hpe madi shadaw ai Miwa hpe mung nra sharawng ai lam, gum shem ai myen hpyen dap hpe htum hkra gasat ai lam hta pawng hpawm shang lawm ga nga ai laika pa ni hpai nna n-gun madun ai re hpe mung chye lu ai.

Myen hpyen dap woi awn nna myen mungdan ting woi galaw na hkyen nga ai tara n shang ai ra lata poi hpe n galaw byin hkra ninghkap ai lam hta shang lawm sa wa ga nga nna Hpakant ginra masha ni woi galaw nga ai re.

Ra lata poi lamang hpe Hpakant ginra masha ni gaw tsep kawp ning hkap ai lam tsun da ai re, ya aten Hpakant ginra hpyen masa mung grai shaja hkat nga ai re hte laknak kaba hkrup mara gap bun ai majaw Mung masha asak si sum ai lam ni law nga ai re hpe mung chye lu ai.

Shiga- Pyilan U

Photo credit to Owner