Rawt Malan Hpung Ni Zing Madu Da Ai Sai Ginra Hta Raitim Ginra Masha Dum Nta De N Gwi Wa Ai Lam

Pajau Media

14 November 2025

Myen hpyen dap a htu shadut majan gaw n dai hpang daw de lagaw lam htu shadut ai hta nbungli hpe madung jai lang nna htim gasat wa ai rai nna gasat poi nbyin ai shara hkan nbungli bawm jahkrat ai lam jahkring hkring galaw ai majaw ya aten rawt malan hpung ni zing madu da sai Indaw ginra mayan hkan na mung masha ni buga de n gwi wa shi ai re lam chye lu ai.

Indaw Muklum hpe KIA rawt malan pawng hpawm ni zing madu da ai gaw 2025 April shata kaw na rai sai hte ya aten NUG asuya uphkang ai n pu hta nga taw ai shata 6 jan wa sai re. Raitim Indaw Bamauk lam ntsa kaw na mare kahtawng 12 hkan na mung masha tsa lam gaw Myen hpyen dap a n bungli bawm hpe hkrit tsang ai majaw ya ten du hkra dum nta de n gwi wa ai re hpe mung chye lu ai.

Dai hpyen koi yen mung masha ni gaw Indaw muklum zing majan n hpang shi ai 2023 march shata kaw nna Myen hpyen dap kawn nbungli bawm jahkrat bun ai lam, mare dum nta wan nat jahten hkrum ai masa lam ni a majaw hprawng koi yen ra mat ai ni re hte mung masha n kau gaw wa shanu na dum nta n lu ai ni lawm ai re.

Indaw ginra mayan de mung shani shagu nbungli pyen gawai ai lam ni nga ai re majaw ginra masha ni grai myit tsang nga ma ai re. Indaw ginra htim gasat majan hta KIA, ABSDF Myen mung jawngma Dap, PDF hpung ni pawng hpawm nna htim gasat zing madu da ai ginra langai rai nga ai re hpe mung chye lu ai.

Shiga- Pyilan u