Rev. Dr Hkalam Samson Hte Seng Nna KBC Ginjaw Kawn Ndau Laika Shapraw Ai Lam

Pajau Media Channel

3rd May, 2024

Myen hpyen dap kawn KBC ningbaw usa Rev. Dr. Hkalam Samson hpe Myen htunghkying hka Jaw poi ngut ai hpang April 17 ya shani htawng masha shalawt ai hta lawm wa ai raitim lawt pru wa ai hkying hkum 24 n hpring shi ai aten bai rim woi mat ai lam hte seng nna KBC ginjaw kawn May 3 ya shani n dau laika shapraw ai lam nga ai re hpe mu chye lu ai.

Ndau laika hta Rev. Dr. Hkalam Samson hpe myen shaning n nan shani shalawt hkrum ai raitim shana 9:30 PM aten daram hta dum nta kaw na nan Myen hpyen dap kawn bai woi mat ai hpang dai ni du hkra bai lawt pru ai lam n nga ai a ntsa dum nta masha ni hte KBC ginjaw kaw nna myit npyaw myit tsang ai, sara kaba gaw asak mung kaba wa sai hte maren hkum hkrang hkam kaja lam n nga ai, tsi tsi hkam la ra ai, nta masha ni hte ni htep ai hku nga ra ai aten re majaw dum nta de lawan ai hku du wa na hpe myit mada ai nga nna KBC ginjaw a n dau laika kaw lawm ai re.

Rev. Dr. Hkalam Samson hpe Myen hpyen dap kawn lai wa sai 2022 ning December praw 5 ya shani Thai mungdan de tsi tsi hkam la na matu Mandalay nbungli daru kaw n bungli jawn na aten hpe la nga ai shaloi rim hkrum ai re hpang tara jewat nna htawng dam kru ning jahkrat hkrum ai re. Sara kaba hpe bai rim woi mat ai lam hte seng nna myen hpyen dap tsun ahkang lu ai salang wa shiga dap ni de tsun da ai hta simsa lam hte seng nna bawng ban jahkrup ra ai lam nga majaw bai woi mat ai re hte hpang shani jang bai dat ya na nga ai raitim dai ni aten du hkra bai dat ya ai lam n nga ai re hpe mung chye lu ai.