Rim Hkrum Ai Sar Maw Mare Masha N Kau Hpe Bai Dat Ya Ai Lam

Pajau Media Channel

2nd April, 2024

Mogaung ginra Sar Maw mare Lawk (2) Uphkang Salang rim woi hkrum ai hpang Sar Maw ginra kata Myen hpyen dap hpung ni gaw mare kata hkan sawk jep rim ai lam ni galaw ai hta March (31) ya shani rim ai ICM nawku wang kaw na marai (30) jan hpe mung dat ya sai hte dai shani lai wa lai sa lam hkan rim hkrum ai Jinghpaw masha Marai ( hpe gaw April 2 ya shani bai dat ya ai lam ginra masha ni tsun ai.

Shalawt hkrum ai kaw na marai (5) daram hpe mare salang rim hkrum ai lam hte seng nna sagawn shagun ai lam, shahte masha jep hkawm ai shara shagu de woi hkawm ai lam, shara madun shangun ai zawn re ai ni galaw ai lam ginra masha langai tsun ai. “ICM nawku jawng wang kaw na rim hkrum ai marai (30) jan gaw lawt sai dai kaw na marai (2) hpe gaw mare salang hpe kadai ni woi mat ai ngu hpe sagawn shangun ai, Mare kata Lam ntsa hkan lai wa lai sa mung masha ni hpe rim ai hta asak 12/13 re ai ma ni mung lawm ai, ya anhte chye lawm ai pyi marai (10) jan re, kaga anhte n chye ai ni mung kade she lawm na, dai ni hpe hpyen dap kaw rim da ai, anhte chye ai masha ni kaw na marai ( daram hpe gaw bai dat ya sai ”.

March (31) ya shani (1:00) PM daram hta Sar Maw Lawk (2) na mare salang U Tan Awng Kyi hpe kadai gara uhpung ni re mying n chye lu ai hpung ni kawn rim woi hkrum ai hpang shana daw myen hpyen dap pawng hpawm hpung ni gaw mare kata pru shang jep chyoi ai lam nta hkan sawk jep ai lam ni galaw ai re hpe mung chye lu ai. Rim hkrum ai kaw na lawt wa ai ni hpe mung mare kata kaw kyin yu hku nna galaw shangun ai hte ra ai hta hkan nna bai shaga wa na lam myen hpyen dap tsun ai re hpe mung chye lu ai.

Rim hkrum ai masha marai kade re ngu tup hkrak n lu tsun ai raitim n lu lawt wa shi ai ni law law re, dai ni hpe gaw Mare salang wa n pru wa dingsa n dat ya ai ngu tsun ai lam ni mung nga ai re. Mare salang wa hpe rim ai hta Sar Maw mare Lawk (6) kaw na masha langai lawm ai lam shiga mawng ai hpang kade n na ai aten Sarmaw Mare kata de myen hpyen dap sawk jep, mu mamu mung masha hpe rim woi ai lam ni galaw nga dingyang re hpe mung chye lu ai.