Sadung Ginra De Nbungli Bawm Bai Wa Jahkrat Ai Lam

Pajau Media

November 19, 2025

Jinghpaw Mung Waimaw Kanpaiti lam ntsa kaw nga ai Sadung Muklum de myen hpyen dap gaw gasat gala majan n byin tim Nbungli bawm wa jahkrat bun ai lam chye lu ai.

November 16 ya jahpawt daw hkying 10 grup yin aten daram hta Y-12 Nbungli hte bawm lahkawng lang wa jahkrat bun ai rai nna jahkrat dat ai Nbungli bawm gaw lam kaba lai nna wa hkrat kapaw ai majaw masha hkra hkala ai lam, dum nta hten za ai lam gaw n nga ai re hpe chye lu ai.

Sadung ginra kata gasat gala majan n nga tim Nbungli hku htim gasat ai gaw Myen hpyen dap gaw shanhte hpe ninghkap ai ni yawng hpe hpyen hku masat nna htim gasat taw ai re lam, KIA zing madu uphkang taw sai ginra ni hpe bai htim gasat zing la lu ai lam n nga ai yang yawng jahten kau na ngu ai masing kata ya na zawn galaw nga ai re majaw Shanglawt uphkang ginra kata nga Mung masha ni mung ntsa hpyen sadi maja ai lam ja ja galaw ra ai lam KIO tsun ahkang lu Salang tsun da ai re.

Gasat gala majan byin ai lam n nga ai Sadung Muklum de kajawng kaja Nbungli bawm gasat hkrum ai majaw ginra masha ni grai hkrit tsang nga ma ai re hte lai wa sai September 29 ya hta mung Myen hpyen dap a Nbungli bawm gaw sadung gat pa kaw wa hkrat kapaw nna ma kaji 3 mung lawm yang Mung masha marai 8 asak si sum nna marai 6 hkala sawng ai lam byin lai wa sai re.

Shiga – Pyilan U