Sadung Ginra Du Hkra Nbungli Bawm Jahkrat Bun Ai Majaw Waimaw Ginra Masha Ni Gahtap Yen Ra Ai Lam

Pajau Media

September 12, 2025

Jinghpaw Mung Waimaw Lamyang de myen hpyen dap hpyen n-gun htu shadut nga ai sha n-ga nbungli bawm jahkrat bun ai majaw Sadung Wa Shawng ginra masha ni bai gahtap yen ra ai lam chye lu ai.

Ya aten Lamyang makau hkan majan laja nga ai rai nna myen hpyen dap gaw Nam Wa, Mukchyik, hte Sadung ginra hkan du hkra nbungli bawm jahkrat htu shadut wa ai re lam chye lu ai.

Dai majaw Sadung lam mayan Wa Shawng mare hte makau grup yin mare hkan na Mung masha ni bai gahtap yen ra ai lam chye lu ai.

August shata kaw na bai laja wa ai gasat gala majan hta Waimaw Hk.L.Y 58 dap, M.P.Hk, Lay Kung, Chyet Pawng Chan kaw nna shani shana laknak kaba gap bang nga ai lam chye lu ai.

 Wa Shawng, Muk Chyik, Lamyang hkan na Mung masha ni gaw lai wa sai shaning kaw nna hpyen koi yen ra ai re hte ya bai gahtap yen ra ai re hpe mung chye lu ai.

Jinghpaw Mung Waimaw, Manmaw, Hpakant ginra ni hta gasat gala majan grai laja nga ai re hpe mung chye lu ai.

Shiga - Hpring