Sadung Ginra Nbungli Bawm Jahkrat Ai Hta Mung Masha Marai 8 Asak Si Sum Ai Lam

Pajau Media

September 30, 2025

Jinghpaw Mung Waimaw Kanpaiti sa lam n tsa na Sadung Muklum kaw September 29 ya shani Nbungli bawm wa jahkrat ai majaw dum nta ni hten za mat ai hte Mung masha Marai 8 asak si sum nna, Marai 5 gaw hkala ai lam chye lu ai.

" Sadung gat ka-ang kaw wa hkrat ai, Mung masha asak si sum ai zawn dum n ta ni mung hten za ai" nga nna Sadung Ginra masha tsun ai.

Dai sha n-ga Myen hpyen dap gaw Sadung de bawm jahkrat ngut ai hpang Wa Ahawng lahta daw Man Win ginra de mung bawm wa jahkrat ai lam Man Win ginra masha tsun ai.

"Sadung maga de bawm jahkrat ai hpang n dai Man Win de mung wa jahkrat ai, myo ka-ang de gaw n hkrat ai, Bum lagaw daram kaw wa hkrat ai, masha hkra hkala ai gaw n nga ai" nga nna tsun ai.

Lai wa sai 2024 June shata kaw nna KIO kawn htim gasat zing madu da ai Sadung ginra de gasat gala n nga tim Myen hpyen dap nbungli bawm wa jahkrat ai re.

Myen hpyen dap gaw Sadung maga de htu shadut wa ai sha n-ga Waimaw Lamyang gasat gala majan hta mung Ga lam hku htu shadut ai sha n-ga Nbungli, Drone bawm wa jahkrat nna shani shagu Laknak kaba gap bang nga ai re hpe chye lu ai.

Shiga - Hpring