Sagaing Ginra Mayan Mawdaw Hkrun Lam Hta Pyusawhti P.T.Ts Jep Joi Shara Ni Hta Gumhpraw Hpyi Shagyeng Ai Lam Laja Lana Galaw

Pajau Media Channel

26th March, 2024

Myen hpen dap n pu Pyusawhti P.T.Ts hpung ni gaw Sagaing ginra kata na mung chying masat (5/) lang ai hkrun lam hkawm masha ni hpe hkap jahkring gumhpraw hpyi shagyeng ai lam ni laja lana galaw nga ai re hpe chye lu ai.

Sagaing ginra gaw Myen hpyen dap hpe ninghkap n ra sharawng rawt malan ai PDF hpung ni shanu machyu nga ai ginjaw ginra langai hku mying gumhkawng ai sha n-ga dai ginra hkan na ni yawng gaw PDF hpung ni hte matut mahkai nga ai ngu sawn la nna madung jep joi gumhpraw hta ai re lam chye lu ai.

Sagaing kaw nna Myitkyina de pru hkawm wa ai hkrun lam hkawm masha langai kawn mung Pyusawhti jep joi shara hta jahkring hkrum nna atik anang gumhpraw hpyi shagyeng ai masa hpe ya na zawn tsun ai re. “Ngai na mung chying masat gaw (5/) re. Dai hpe wa gumhpraw n jaw yang lai ahkang n jaw ai ngu hpyi shagyeng ai re. Hkrun lam hkawm ai lam hta grai dingbai dingna byin ai” nga nna tsun ai re.

Jinghpaw Mung hte Sagaing, Katar mayan hta hkawm SA hkawm wa mung masha ni hpe gumhpraw ladu lai hpyi shagyeng ai hte Pyusawhti hpung ni kawn ga baw amyu myu hte jep shatsang gumhpraw hpyi ai lam ni a majaw hkrun lam hkawm sa masha ni grai yawm wa ai lam mawdaw la ni tsun ai.

“Hkrun lam masha ni kaw na gumhpraw ladu lai hpyi shagyeng ai majaw hkrun lam hkawm masha ram ram yawm mat sai. Mawdaw gau sha ai bungli mung grai ahtu hkra wa sai” nga nna mawdaw la ni tsun nga ma ai re.

Pyusawhti hpung ni gaw Sagaing ginra (5/) ni hpe masat shingte tawn nna jahkrit shama gumhpraw hpyi shagyeng ai lam gaw Myen mungdan kata na gasat gala majan byin ai ginra hta shanu nga ai mung masha ni a matu grai yak hkak myit dut dang lam re sha n-ga mawdaw hkrun lam hte sut hpaga gun rai htaw shalai la ai lam ni hta mung grai yak hkak dut dang nga ai masa re lam tsun dinglun nga ma ai re hpe mung chye lu ai.