Salang Hkyet Hting Nan Hte Jan Doi Bu Ni Ra Lata Poi Shang Shingjawng Na Lam

Pajau Media

October 20, 2025

Jinnghpaw Mung kaw nna Rapdaw shagu a matu kadai dai shang shingjawng na ngu ai Hpung Shang Salang ni a mying jahpan October 19 ya shani jahpan pru wa sai re.

Jinghpaw Mungdaw Rapdaw Salang hku nna Jinghpaw Mung Hkringmang Daju Salang Hkyet Hting Nan, Myen hpyen dap hpung shang dingsa Jan Doi Bu hte Gwi Htu P.T.Ts Ningbaw U Sa Lasang Awng Wa a Madu Jan, Gunhtang Kaw Shen ni hku nna Myen hpyen dap woi awn galaw na Ra lata poi hta shang shingjawng na re lam chye lu ai.

Jinghpaw Mung Hkringmang Daju Salang Hkyet Hting Nan gaw Myitkyina Rapdaw Salang shara hta shang shingjawng na matu rai nna, Jan Doi Bu gaw Jinghpaw Mung masat (5) Amyu Sha Rapdaw Salang hku nna shang shingjawng na re. Dai sha n-ga Gwi Htu P.T.Ts Usa Lasang Awng Wa a Madu Jan Gunhtang Kaw Shen gaw Waimaw ginra hku nna shang shingjawng na re lam chye lu ai.

Salang Hkyet Hting Nan hte Daw Doi Bu ni gaw lai wa sai 2010 Ra lata poi hta Rapdaw Dat Kasa shara kaw shingjawng ai hta awng dang lai wa sai rai nna 2015, 2020 ra lata poi ni hta mung shang shingjawng lai wa sai rai nna 2025 shaning ni hta mung kalang bai shang shingjawng hkyen ai re hpe chye lu ai.

 Myen hpyen dap woi awn na Ra lata poi hpe December 28 kaw nna galaw na hte ginra 102 kaw galaw sa wa na re lam chye lu ai.

Shiga – Htu Seng