Sam Hkyeng P.T.Ts Hpung Lahkawng Garan Nna Hpyen Laja Lana Lahkawn Nga

Pajau Media

May 7.2025

Mohnyin Bilu ginra kata Sam HKyeng P.T.Ts ni gaw hpung lahkawng garan nna ningmu n bung hkat ai hte Sam Hkyeng ramma lahkawn ai lam shingjawng nna galaw nga ma ai lam chye lu ai.

“Sam laili laika hte htung hkying hpe hkang zing nna Sam amyu sha lam yan hpe grau galaw na ngu ai hpung hte Myen hpyen dap n pu lak nak lang ai Sam Hkyen hpung ni n htuk hkat ai re. Sam amyu sha a matu galaw na nga ai hpung ni gaw asak 12, 14 re ai pang ni hpe du hkra lahkawn la ai, ngut na Nam Mun Awng Mye shagyit de sa nna hpyen Wun Kat jaw ai. Myen hpyen dap hte pawng ai Sam Hkyeng ni mung Myi maga mi n mu ai ni hpe du hkra n ngam ai sha lahkawn ai,” nga nna tsun ai re.

Dai Sam Hkyeng P.T.Ts hpung lahkawng gaw lai wa sai April shata htum maga kaw nna Bilu ginra Ung San Sai mare sa lam kaw lahkawng maga gap hkat ai re hte hpung lahkawng kawn hpyen lahkawn ai lam ni mung grai galaw nga ai re hpe chye lu ai.

“Mare kata kaw na asak kaji nna dinghku de sai ni gaw bungli hte shinggan de pru na nga tim hpyen lahkawn na tsang ai majaw Ma ba nna she hkawm sa ai. Ma hte hpawn lahkawn hkrum ai ni gaw ma du hkra lawm mat ai lam nga ai. Ma kanu ni hkan sa yang she Ma hpe bai ap ya ai lam ni galaw ai re,” nga nna mutut tsun dan ai re.

Sam Hkyeng P.T.Ts u hpung langai gaw asak 12, 14 pang num la n ginhka lahkawn nga ai sha n-ga Myen hpyen dap npu na P.T.Ts ni gaw lahkawn la da ai masha ni hpe Mogaung ginra Nan Hkwi Myen hpyen dap de hpyen wunkat la na matu sa ai re hpe mung chye lu ai.

 Ya aten dai Sam Hkyeng P.T.Ts hpung lahkawng gaw Mohnyin ginra kata hta ak nak lang nna wang lu wang lang shamu shamawt nga ai sha n-ga shana de hkying 4:00 pm kaw nna hpyen lahkawn ai lam galaw nga dingyang re hpe mung chye lu ai.

Shiga- Kachin Pyi Tar