Sam Hkyeng P.T.Ts Ni Hpyen Laja Lana Lahkawn Nga

Pajau Media

May 16.2025

Jinghpaw Mung Mohnyin ginra hta Sam Hkyeng P.T.Ts ni gaw asak n hpring ai ma ni hpe atik anang hpyen lahkawn ai lam ni galaw nga ai lam ginra masha ni tsun ai kaw na chye lu ai.

Ya na zawn masha lahkawn na matu lahta matsun mung nga ai re majaw Sam Hkyeng Hpung ni gaw Mare kata Hpung Gyi Jawng hkan du hkra shara jahkrat nga nna asak n hpring ai ni hpe du hkra hpyen lahkawn nga ai gaw shata (5) daram na wa sai re.

Atik anang lahkawn da ai ni hpe Nam Mun Awng Mye shagyit KBC Nawku Jawng wang kaw hpyen shaman shakyang ai lam ni galaw nga ai lam hpe atik anang woi hkrum ai mare masha ni tsun ai.

“In Jin mare Pung Chyaung mare kaw hpyen magam gun na matu jahpan lawm ai ni gaw asak (16) ning pyi n hpring shi ai, dai La kasha gaw salum ana ma lu ai, kanau kana mung n lu kanu hte nga ai re, n dai masa ni hpe yu ai hte Sam Hkyeng P.T.Ts ni gaw hpyen magam n gun n mai ngu ai tara hpe galaw nga ai re,” ginra masha asak (49) ning re ai salang langai tsun ai re.

Hpyen lahkawn ai hta nta kata kaw na nan garawt nna lahkawn mat ai zawn re ai ni galaw ai lam chye lu ai. Lai wa lai sa ni hpe hkap jahkring la nna amyu myu tsun masu nna woi mat n htawm kalang ta hpyen shaman ai shara de wa sa ai zawn re ai ni galaw ai re hpe mung chye lu ai.

“Sam Hkyeng ni gaw masha n lahkawn shi ai aten mare kahtawng ni hkan (5) ya daram gawan ai hpang she ramma ni hpe mu ai shara kaw rim woi ai lam ni galaw ai re. Garum kahtau hpung mawdaw ni hkan jawn nna masha rim ai re, nta makau hkan mawdaw n sen na ai hte pyi hkrit ra taw sai.”

Rim lahkawn ai hta asak (12) kaw nna (55) lahpran num la n ginhka rim woi ai lam galaw nga ai majaw ya aten numdaw hte numdaw hpyen shaman shakyang ai lam hpe Awng Mye shaggyit KBC nawku jawng kaw galaw ai hta masha (5,000) hkawt du nga sai re hpe mung chye lu ai.

Shiga- Kachin Pyi Tar