Sam Mung Ginra N htoi 20 Ya Laman Amyu Shayi 18 Hte Shadang La 11 Asak Si Sum Ai Lam

Pajau Media

October 22, 2025

Mungdan Bawng masha ni hpe garum ai hpung AA PP kawn hta gahkyin tang madun da ai hta October praw kaw na 21 ya du hkra Sam Mung ginra kata Myen hpyen dap a majaw Amyu Shayi marai 18, La marai 11Asak si sum ai lam chye lu ai.

Asak si sum ai hta Asak 2 ning re ai La kasha langai, 18 ning n pu na Ma marai 8 mung lawm nna asak si sum ai ni yawng gaw Nbungli bawm a majaw re lam chye lu ai. Dai sha n-ga naw shagrin la ra ai asak si sum masha marai 13 naw nga ai lam chye lu ai.

Lai wa sai October 18 ya shani Sam Mung, Nam San ginra, Gum He mare de Myen hpyen dap gaw n gun kaba ai Bawm ni wa jahkrat ai majaw asak 10 ning re ai Ma langai hte amyu shayi marai 5, La marai 1 bawm hkyep hkra nna kalang ta asak si sum mat ai lam chye lu ai.

Myen hpyen dap n tara ai hku Mungdan Uphkang wa ai hpang ninghkap rawt malan ai ni hpe Laknak n-gun kaba hte htim gasat nga ai sha n-ga gasat poi n nga tim Nbungli Bawm jahkrat bun ai lam dingyang galaw nga ai re hpe chye lu ai.

Dai zawn sha Jinghpaw Mung kata hta mung September praw kaw nna dai ni aten du hkra Myen hpyen dap Nbungli hte kin yu yu hkawm ai lam, Drone pyen gawai ai lam, Laknak kaba gap bun ai lam gaw shani shagu nga ai rai nna Myitkyina Waimaw Maga de Laknak kaba gap garum ai lam mung dingyang naw rai nga ai lam chye lu ai.

Shiga - Htu seng

Photo credit to AAPP