Seng Tawng Kaw Myen Hpyen Dap Kawn Lak Nak Kaba Gap Shadam Ai Majaw Mung Masha N Kau Hkala Hkrum Ai Lam

Pajau Media

September 22.2025

Hpakant Seng Tawng mare kaw lai wa sai September 20 ya kaw nna gasat gala majan n nga ai sha Myen hpyen dap gaw laknak kaba gap shadam ai majaw Mung masha n kau hkala hkrum ai lam nga ai re hpe chye lu ai.

Myen hpyen dap gap ai laknak kaba gaw Seng Tawng daw (3) maga de na Lawk de wa hkrat nna Mung masha n kau hkra hkala ai hte, dum nta (2) hten za mat ai lam chye lu ai. Hpakant ginra hta Phone, Internet yak hkak ai majaw hkala hkrum ai lam ni hpe san sagawn la na matu mung yak hkak ai masa re hpe mung chye lu ai.

September 19 ya shani Myen hpyen dap n pu na P.T.Ts hpung ni hte SNA hpung ni gaw Htung Bu mare ( ထုံးဘို ) kaw Drone bawm (3) lang wa jahkrat ai majaw Mung masha dum nta hten za ai lam, amyu shayi langai hte la marai langai rai yang marai lahkawng asak si sum ai lam chye lu ai.

Hpakant ginra hta ya aten hpyen masa grau grau laja wa ai re ai majaw Mung masha law malawng gaw hprawng koi yen nga ai re sha n-ga Hpakant Muklum nawku jawng wang, hpunggyi jawng hkan koi yen nga ai Mung masha ni mung dawng hkawn ahpraw sharawt nna myitkyina maga de hprawng koi yen wa ai re lam chye lu ai.

Myen hpyen dap gaw Mung masha ni hpe jahkrit shama nna ra lata poi a matu hkyen lajang nga ai re nga nna Mung masha ni tsun nga ma ai re hpe mung chye lu ai.

Shiga- Kachin pyi Tar