September Shata Laman Hpakant Ginra Kata Hkala, Asak Si Sum Ai Lam Hte Rim Hkrum Ai Lam

Pajau Media

September 29, 2025

Jinghpaw Mung, Hpakant ginra hta September shata laman Gumshem Myen hpyen dap a laknak kaba, drone gap shadam bun ai, sinat gap sat hkrum ai hte nteng nman rim hkrum ai a majaw, hkrat sum ai Mung masha yawng rai yang (59) tup re sai lam chye lu ai.

Gumshem Myen hpyen dap a majaw asak si sum ai marai (18), hkala hkrum ai (28) hte nteng nman rim hkrum ai (13) tup du nga sai rai nna, September 23 ya shani hta rim hkrum ai ni hpe, tup hkrak nchye lu shi ai majaw san sagawn nga ding yang re hte ndai jahpan ni hpe gaw, Pajau Media kawn lu la ai shiga ni hta mahta nna, gahkyin ginlen da ai re.

September praw 1ya hta sinat gap sat hkrum ai La (1) asak si sum nna, Mung masha (3)gaw laknak kaba hkrat kapaw ai majaw asak si sum ai hte marai (4) gaw rim hkrum mat ai re.

 September praw 2 hta La (1) sinat gap sat hkrum nna, praw 5 ya shani hta gaw la (4) masha makawp ninggang shatai rim hkrum lai wa sai.

September praw 6 shani hta gasat poi byin ai shara kawn gap dat ai pala hkra ai majaw ma (2) hte hpunggyi (1) hkala hkrum nna, laknak kaba a majaw ma (2) hkala hkrum sai.

Dai hpang nhtoi 7 ya shani hta gaw, amyu shayi(1) sinat gap hkrum nna ningma lu hkala ai zawn, amyu shayi marai (5) gaw nteng nman rim hkrum lai wa ai hpe chye lu ai. Nhtoi 9 ya shani hta mung, laknak kaba hkrat kapaw ai majaw Mung masha marai (11) hkala hkrum sai re.

Nhtoi 16 ya hta la (1) hte ma (1) gaw laknak kaba a majaw ningma lu hkala hkrum nna, la(1) sinat gap katut nna asak si sum ai re hte nhtoi 17 ya hta gaw laknak kaba a majaw ma(1) asak si sum nna, Mung masha(3) hkala hkrum ai hte la(1) sinat gap sat hkrum ai.

Nhtoi 19 hta mung la(1) sinat gap hkrum nna laknak kaba majaw la(1) si sum ai hte Drone bawm majaw amyu shayi(1) hte la(1) asak si sum ai sha n-ga, nhtoi 20 ya mung Mung masha (1) laknak kaba majaw si sum ai re. Dai hpang 22 ya hta gaw Drone bawm a majaw, kawa hte kasha yan asak si sum ai.

Nhtoi 23 hta mung laknak kaba kapaw ai majaw Mung masha (4) si sum nna, marai(1) hkala ai hte rim hkrum ai ni mung nga ai raitim tup hkrak nchye lu shi ai re. laknak kaba a majaw Mung masha marai (4) hpang shani hta kalang bai hkala hkrum sai.

Gumshem Myen hpyen dap gaw Hpakant ginra kata gasat gala grau laja wa mai ai re majaw nhtoi praw 2 ya shani kaw nna, Muklum kata nga ai Asuya hpaji jawng ni ma hkra hpe pat da na matu ndau da lai wa sai re.

Shi Sawk – Kachin Pyi Tar