Shana Aten Muklum Kata Myen Hpyen Dap Shamu Shamawt Nga Ai Majaw Sadi Maja Ra Ai Lam

Pajau Media

September 8, 2025

Jinghpaw Mung ginra hpyen masa gaw grai shaja hkat nga ai aten mung rai nna myen hpyen dap hpung ni gaw Muklum kata shana aten shamu shamawt hkawm nga ai grau galaw wa ai nga nna ginra masha ni tsun ai re.

" Myitkyina Muklum kata shani shana shimlam la, gawan hkawm ai lam grau galaw wa ai, shana hkan grau ai masha rim, shanhte mung KIA ni muklum kata hpyen lahkawn hkawm nga ai ngu maram sam ai, dai majaw muklum kata shana aten hkan grai gawan ai, hkawm sa hkawm wa grai sadi ra ai" nga nna ginra masha myitsu salang langai tsun ai re.

Muklum kata shana hkying 8 hpang daw kaw nna gaw lam braw hkan sin nna jep joi ai lam ni grau galaw wa ai re majaw shana aten mai byin yang n hkawm yang kaja ai. Myen hpyen dap rim woi hkrum yang grau tsang ra ai nga nna mung matut tsun ai re.

“Ya gaw gara kaw mung shimlum lam n nga sai, muklum hkan mung lahkawng maga hpyen lahkawn ai, raitim shanglawt maga na lahkawn mat yang hpa mi rai rai sagawn la lu ai, myen ni lahkawn sai kaw na gaw hpa shiga mung n na mat si ai mi re hkrung ai mi re nchye, grai sha n ahkyak yang shana shinggan pru ai lam n galaw ga” nga nna tsun ai re.

Myen hpyen hpung ni gaw Myitkyina muklum kata shana aten shamu ai lam grau galaw wa ai hte ramma ni pyaw len ginra KTV hkan shang rim ai lam ni nga ai lam, grau nna Nam Jim sa lam Chyarapati maga de gaw shani shana aten n tam hkap jahkring jep joi ai lam ni galaw nga dingyang re lam ginra masha ni tsun ai kaw na chye lu ai.

Shiga- Pyilan U