Shanglawt Uphkang Ginra Kata Ma Ni A Matu Makawp Maga Tsi Mawan Grai Yak Hkak Nga

Pajau Media

April 23.2025

Ya aten Shanglawt uphkang ginra ni rai nga ai Mai Ja Yang, Nba pa, Mai Bat hte jarit mayan hta ma kaji ni, ma hkum kanu ni a matu n-gun tsi, makawp maga tsi ni grai yak hkak nga ai lam Mai Ja Yang ginra nga mung masha langai tsun ai.

“Ma shangai ai aten kaw nna ma kaji ni gaw makawp maga tsi htu nan htu ra ai, raitim anhte shang lawt uphkang ginra jarit mayan hkan gaw tsi ndu ai majaw Mai Ja Yang kaw na Muse de wa htu ra ai, dai pyi tsi htu na matu shata mi daram kaw nna mying jahpan jau galaw da ra ai,” nga nna yak hkak nga ai masa lam hpe Muse ginra de tsi wa htu ai ma kanu langai tsun ai re.

Jarit mayan ginra de ma hte seng ai tsi mawan ni n du mat ai gaw 1027 hpyen masing ngut ai kaw na rai sai lam, ma makawp maga tsi ni n du ai majaw ahkyak ai makawp maga tsi n lu htu ai ma ni grai law wa ai re. Ma hkum kanu hte seng nna mung tsi n lu sha ai majaw tsi n sha, makawp maga tsi nlu htu ai ni law law nga ai lam matut tsun dan ai re.

“Tsi mawan shalai la na matu grai yak ai majaw re nga nna tsi sara ma ni gaw tsun ai. Nga ai hkan sha mung tsi n law ai re majaw jahpawt jau hkying 4, 5 hkan nna sa tsap la nga ra ai, dai pyi lu htu ai ni sha lu htu ai nlu htu ai ni gaw mi na raw bai n htang wa ra ai. Ya Muse de wa htu ai mung shata mi ram jau mying jahpan bang da ra ai, dai kaw mung jau jau kaw nna sa la tsap yang she lu htu ai. Mying jahpan n bang da ai ni gaw jau wa la tim nlu htu ai ni law law re, grai yak ai tsi mawan,” nga nna tsun dan ai re.

Jarit mayan hta hpyen yen mung grai law ai re. Ya na zawn masa shuk shanut nga ai lapran hta tam lu tam sha yak, Ja gumhpraw yak hkak ai ni gaw tinang nga ai shara kaw tsi mawan n nga yang tsan ai de hkawm sa na matu grai yak ai re.

Ya aten Mai Ja Yang kaw nna Muse ginra de tsi wa htu na matu wa wa sa sa lam shabrai sen 5 grupyin ma ai re hte tam lu tam sha yak hkak ai masa hta grai yak nga ai lam tsun ai re. Ya aten jarit mayan ginra hta ma kaji hte ma hkum kanu ni hta ra ahkyak ai n-gun tsi, makawp maga tsi ni grai yak hkak taw ai lam ginra masha ni tsun dan ai re.

Shiga- Pyilan U