Shanglawt Uphkang Ginra Na Buga Kahtawng Ni Hkan Tsi Rung Tsi Gawk N Nga ai Majaw Buga Masha Ni Myit Tsang Nga

Pajau Media

May 14.2025

Ya aten shanglawt uphkang ginra kata na mare kahtawng ni hta hpyen koi yen mung masha ni mare wa gap let wa nga magang sai raitim mare kata hkam ja lam tsi gawn lajang shara Tsi Rung Tsi Gawk ni n nga ai majaw yak hkak nga ai lam buga masha ni tsun ai kaw na chye lu ai.

“Ya gaw ginra law malawng gaw shanglawt uphkang ginra re sai, dai majaw yawng gaw buga na hpe madung hkyen lajang ai, wa ai ni mung grai law wa sai, raitim mare kaw hkam ja lam hte seng nna hpa n nga shi ai. Tsi rung tsi gawk n nga ai gaw mayak kaba langai re, ya gaw machyi makaw hkrum yang Laiza de n rai yang Myo de gagat ra ai majaw yak nga ai,” nga nna Ja Bu mare masha langai tsun ai.

Tinang buga htingbut htingra tawn kau da ai shaning shi jan ning na sai majaw htingput htingra jasan jaseng let wa nga ai ni law sai re, raitim aten galu machyi ai masha ni gaw tsi rung tsi gawk n nga yang grai yak ai majaw wa na matu n mai shi ai ni law law re. Mare kahtawng buga langai hta n nga n mai re ai hpaji lam, hkamja lam hte seng ai lam ni hpe lit nga ai asuya kawn mung lit la galaw na hpe buga masha ni ra sharawng nga ma ai re.

Shang lawt uphkang ginra rai nga ai Miwa jarit mayan Laiza Mai Ja Yang ginra hkan mung Ma Kaji ni htu ra ai tsi mawan aten dep n lu du ai majaw law malawng gaw Myo de sa nna wa htu ra ai madang re. Jarit mayan hkan na Ma Hkum Kanu ni, Ma Kaji n kau gaw tsi mawan n hkum ai majaw n-gun tsi n sha, tsi n htu ai ni law wa ai lam Mai Ja Yang ginra masha langai tsun dan ai re.

Ya aten Myitkyina Manmaw lam ntsa na Gara Yang, Katsu, Dabak, Awng Ja, Nam San Yang, Ja Bu hkan gaw shanglawt uphkang ginra re sai majaw law malawng wa nga magang sai raitim n nan wa nga ai shaning re majaw malu masha kaw na hkawt naw myit tsang ra ai hta tsi mawan n hkum ai majaw hkam ja lam a matu myit tsang nga ma ai re lam chye lu ai.

Shiga- Pyilan U