Sharaw Hka Maw Mau Lamyang Hte Maw Mau Kung Maga De Myen Hpyen Dap Nungli Bawm Sha N-Ga Jak Sinat Hte Gap Nga Ai Lam

Pajau Media

August 15, 2025

Gasat gala majan laja nga ai Jinghpaw Mung Hpakant Sharaw Hka, Maw Mau Layang hte Maw Mau Kung mare maga de dai ni hkying 12 aten daram hta Myen hpyen dap nbungli bawm jahkrat ai sha n-ga Jak sinat ni hte mung wa gap kau da ai lam ginra masha ni tsun ai kaw na chye lu ai.

“ Hkying 12 aten daram kaw nbungli hte bawm wa jahkrat bun ai, ngut na Jak sinat hte mung wa gap kau da ai re” nga nna ginra masha langai tsun ai re.

Sharaw Hka mare, Ah Maik Pone mare hte Yu Ma mare ni kaw mung gasat gala majan matut manoi byin nga ai rai nna Myen hpyen dap lak nak kaba hte wa gap ai majaw Mung masha hkala asak si sum nga ai re lam chye lu ai.

KIA pawng hpawm hpung ni uphkang nga ai Hpakant Sik Mu Lam hte Sharaw Hka mare kaw nna Nyawng Pin Kung dap ni hpe Myen hpyen dap kawn August 1 ya hta zing madu la kau ai hpang August 4 ya shani KIA pawng hpawm hpung ni bai htim gasat la lu ai re hpe mung chye lu ai.

Hpakant ginra gasat gala majan gaw shani shagu laja nga ai hta Myen hpyen dap a nbungli bawm jahkrat ai lam hpe Mung masha ni grai sadi maja ra ai lam KIA pawng hpawm hpung ni tsun sadi jaw da ai re.

Myen hpyen dap gaw Hpakant ginra kata htu shadut dingyang rai nna ya aten Hpakant lam mayan, Hpakant Ka Mai Lam ni hta gasat gala majan laja ai 4 ya daram rai wa sai re hpe mung chye lu ai.

Shiga – Hpring