Shata Lahkawng Laman Jinghpaw Mung Na Amyu Shayi Marai (7), Amyu Shadang Marai (9) Asak Si Sum Ai Lam

Pajau Media

September 25, 2025

Jinghpaw Mung hta shata 2 jan laman Myen hpyen dap a majaw asak si sum ai Mung masha marai (16) nga ai re hte dai hta amyu shayi marai (7), Amyu shadang marai (9) lawm ai lam AAPP tsun da ai re.

Dai asak si sum ai ni gaw July praw 1 kaw nna September 24 du hkra rai nna asak si sum ai hta asak 18 ning n pu Ma marai 4 lawm ai lam tsun ai re.

Myen hpyen dap a laknak kaba a majaw Asak si sum ai marai (12), nbungli bawm a majaw marai 4 asak si sum nna naw shagrin la ra ai moi mang 27 nga ai lam matut chye lu ai.

September 22 ya shana daw hkying 6 aten daram hta mung Hpakant Sik Mu mare Chyauk Thwe Tawng mare kaw mung Hpakant Byuha kawng kaw dap jung ai Myen Hpyen dap kawn n tsa lam hku nna Paramotor hte gap bun ai majaw Ko Kyaw Soe hte kasha Mg Htoo htoo San yan asak si sum mat ai re.

September praw kaw nna ya aten du hkra nbungli pyen gawai ai lam, Drone pyen ai lam, laknak kaba gap shadam ai lam gaw shani shagu na nga dingyang rai nna Myitkyina kaw nna Waimaw ginra maga de laknak kaba gap garum ai lam matut manoi galaw nga ai re hpe mung chye lu ai.

Shiga – Htu Seng