Shata Mi Jan Pat Tawn Da Ai Myitkyina Nbungli Lam Bai Hpaw Sai Lam

Pajau Media

2 April 2026

Myitkyina nbungli pa pat da ai shata mi jan na ai hpang nbungli hkrunlam yawng bai hpaw sai hpe nbungli lakmat dut ai seng hkan na chye lu ai.

Myitkyina nbungli hkrunlam bai hkawm na ngu tsun ai rai tim April 4,5,8 shani kaw sha Myitkyina-Mandalay-Yangon lam hkawm sa na hpe nbungli lakmak dut ai ni kawn chye lu ai.

“4 ya shani gaw Air Thanlwin nga ai, praw 7 ya shani hta gaw MAI nga ai. 5 ya shani hte 8 ya shani hta gaw (MNA) nga ai, dung lahkung ni yawng la ma sai. Ya ten hta gaw dai shani hkan na sha naw nga ai hpang de bai lu nlu gaw nchye shi ai” nga tsun ai.

Myanmar National Airlines (MNA) sha n-ga Air KBZ (KBZ Airlines) hte Air Thanlwin nbungli hkrunlam mung hkawm na rai nna nbungli lakmat manu ni mung Myitkyina-Yangon hpe sen 9 jan hte Mandalay-Myitkyina gaw sen 7 jan du hkra rawt wa ai hpe chye lu ai.

Myitkyina nbungli pa hte Putao nbungli pa mung lawm ai hkrunlam matut mahkai mayak nga ai shara ni hpe March 25 ya shani kaw na hpang bai hkawm sa na hpe myen hpyen dap a seng ang ai asuya dap kawn ndau da ai rai tim April praw 4 kaw na Myitkyina-Yangon langai sha hkawm na hpe chye lu ai.

Nbungli hkrunlam pat da ai majaw hkrunlam hkawm ai hta mawdaw lam hpe sha jailang ra nna hkrunlam na ai, lam hkan hpyen masa laja ai lam, hpyen lahkawn ai lam ni nga ai majaw mayak byin nna nbungli hkrunlam hpe lawan bai hpaw na hpe mungshawa ni kawn ra sharawng nga ai re.

Shiga-Zau