Shwe Gu Hka Lam Hku Lung Wa Ai Sanghpaw Hpung Ni Hpe KIA Gap Gasat Ai Lam

Pajau Media

July 28, 2025

Jinghpaw Mung Shwe Gu ginra hta shana hkring nga ai Myen Hpyen Dap Sanghpaw Hpung ni gaw lahta daw de matut manoi lung wa ai lam lapran Nga Bat Wa Mare makau kaw KIA pawnghpawm hpung ni kawn gap gasat dat ai lam chye lu ai.

Lai wa sai July 27 ya shani hta gaw Shwe Gu kaw nna Manmaw Muklum maga de matut manoi Lung wa ai Myen Hpyen Dap Sanghpaw Hpung ni hpe lam lapran kaw gap gasat dat ai hta bai htingnut mat ai lam nga ai re hpe mung chye lu ai.

Dai sha n-ga dai sanghpaw hpung ni hpe shim lam la nna hkingau hku lagaw lam lung wa ai hpung ni hpe mung KIA pawng hpawm hpung ni kawn gap gasat dat ai re lam mung chye lu ai. Myen hpyen dap gaw Jinghpaw Mung Manmaw ginra de Matut manoi htim gasat na matu hpyen garum arung arai sha n-ga malu masha ni hpe htaw lung wa ai re.

Manmaw ginra hta kaba dik hpyen dap rai nga Ts.K.Hk 21 dap naw ngam ai re majaw tat sum ai lam n nga hkra ladat amyu myu hku nna makawp shakut nga ai re hpe mung chye lu ai. Hpyen garum arai htaw ai sanghpaw hpung ni gaw Mali hka lahta daw de matut manoi lung wa dingyang re hpe mung chye lu ai.

Shiga- Hpring