Shwe Li hka Tung kaba wa ai majaw Man win gyi ginra hta Hkai N mai hten za lam law nga ai lam

Pajau Media

July 16, 2025

Miwa Mungdan maga kaw nna lwi yawng wa ai Shwe Li hka kaba wa ai majaw Jinghpaw Mung Man Je, Man Win Gyi ginra kata na mare kahtawng hkan hka ni lim wa ai hte mare lawk (10) lahta gaw hka lim nna Hkai n mai shara law law hten za mat ai lam chye lu ai.

July praw 12 ya daram du hkra Miwa mungdan kata marang ladu lai htu sawng ai sha n-ga hka madim hpaw dat ai majaw Shwe Li hka kaba wa nna hkai lu hkai sha ai hkai n mai ni law law hten za hkrum ai lam chye lu ai.

“ law malawng gaw Sam Mare hkan re, hkai n mai hkai da ai ni, Hkauna lamu ga ni, Kumshu sun ni, Langu sun ni yawng hka lim mat ai, hkum pup hkrai rai mat ai, grai sum machyi sai, shara n kau hkan gaw Hkauna hkai ngut sai ni mung lawm ai, yawng hka lim sai, hpa nan n ngam sai” nga nna nga nna Man Win Gyi ginra masha tsun ai.

Dai sha n-ga hka mung bai n hkrat ai majaw hka lim hkrum ai bat mi daram rai wa sai rai nna galaw da ai hkai n mai sum machyi ai hta hkauna matut galaw na aten gaw lai wa galaw gaw n mai re ai majaw dai ning laman malu masha yak hkak wa na masa nga ai lam mung tsun ai.

Mare kahtawng law malawng hta hkauna hkai shara lamu ga law malawng hten za mat ai sha n-ga Mung masha nga shara dum nta du hkra hka lim hkrum ai re hpe mung chye lu ai. Man Win Gyi gat kata hkan mung mam law nam lap manu ni mung rawt nga ai lam, nam lap n htan langai mi kaw lap 1000 mi du hkra tsaw mat ai re hpe chye lu ai.

Man Win Gyi ginra de Shwe Li hka lim kaba shang wa ai gaw July praw 8 ya kaw nna rai sai hte Shwe Li hka makau mayan shanu nga ai mare kahtawng ni ya aten du hkra hka n hkrat shi ai majaw hkawm sa hkawm wa lam ni mung yak hkak nga ma ai re hpe mung chye lu ai.

Shiga - Htu Seng