Shwe Nyawng Pin Ja Lagat Yang Kaw Myen Hpyen Dap Nbungli Bawm (2) Lang Wa Jahkrat Ai Lam

Pajau Media

26 November 2025

Ndai laman Waimaw ginra hpyen man de shani shagu gasat gala majan byin ai re hte myen hpyen dap gaw aten ntam nbungli bawm jahkrat bun ai hta November 25 ya shana hta mung nbungli bawm 2 lang wa jahkrat bun ai lam chye lu ai.

“ Mana Hkying 8 jan kaw mung kalang wa jahkrat ai, hkying 9 nhtu shi ai shaloi mung kalang wa gayin jahkrat kau da ai re. Nta ni hten ai nga gaw na ai, matut mahkai yak taw ai majaw kata lam shiga wa atsawm n chye lu ai, masha hkala ai lam chyawm n nga da, Shwe Nyawng Pin Ja lagat Yang kaw re ” nga nna dai ginra masha tsun ai re.

Waimaw Lamyang hpyen man de gaw Myen hpyen dap hte KIA pawng hpawm hpung ni grai ni gahtep ai masa nga ai rai nna Myen hpyen dap mung matut manoi htu shadut wa ai majaw gasat gala majan laja nga dingyang re hte gasat gala majan hta laknak kaba lahkawng maga gap shangoi dingyang re lam chye lu ai.

Lai wa sai November 21 ya shana hta mung Waimaw Shwe Nyawng Pin mare kaw shana hkying 11 aten daram hta myen hpyen dap Drone bawm wa jahkrat ai majaw dum nta langai kaw wa hkrat kapaw nna asak 34 ning re ai La langai asak si sum mat nna asak 35 ning re ai amyu shayi hte Asak 11 ning re ai Ma langai hkala sawng nna ya aten du hkra Laiza tsi rung kaw tsi tsi hkam la nga dingyang re lam chye lu ai.

Shiga – Pyilan U