Shwe Nyawng Pin Mare Kaw N Bungli Bawm Wa Jahkrat Bun Ai Majaw Mung Masha Si Hkala Hkrum Ai Lam

Pajau Media

February 5, 2026

Jinghpaw Mung Waimaw ginra Laiza sa lam kaw nga ai Shwe Nyawng Pin mare kaw Myen Hpyen Dap kawn n bungli bawm wa jahkrat bun ai hta mawdaw byeng ai seng kaw wa hkrat kapaw nna mung masha 1si nna 2 hkala hkrum ai lam chye lu ai .

February 4 ya shana daw hkying 4 ,5 aten grup yin hta Myen Hpyen Dap n bungli hte bawm wa jahkrat gasat ai majaw Shwe Nyawng Pin mare kaw nga ai mawdaw work shop kaw wa hkrat nna mawdaw cycle law law wan hkru mat ai lam chye lu ai.

“Mawdaw work shop kaw wa hkrat ai majaw dai kaw byeng da ai mawdaw yawng ngu na daram wan hkru mat ai, masha ma hkala ai, hkala hkrum ai ni hpe Laiza tsi rung de wa sa da sai ” ginra masha langai tsun ai re.

Dai sha n-ga Myen Hpyen Dap gaw KIA pawng hpawm hpung ni zing madu da ai Shwe Nyawng Pin ginra kaw daju ai HK.L.Y (321) makau kaw mung lai wa sai February 2 ya shani n bungli bawm wa gap jahkrat ai lam chye lu ai.

February 2 ya kaw nna Waimaw muklum kaw hpyen hpung ni bai htu shadut wa ai majaw lahkawng maga gasat gala majan laja ai hta n bungli bawm gap gasat ai lam, ginra masha ni si hkala krum ai lam ni , dum nta hten za ai lam ni nga ai re hpe mung chye lu ai.

Shiga- Hpring