Shwegu Ginra Na Hpyen Yen Mung Masha Hkying 6 Jan A Matu Nga Shara Hte Malu Masha Yak Nga Ai Lam

Pajau Media

March 25, 2026

Manmaw ginwang Shwegu ginra kata hpyen yen nga ai hpyen yen mung masha ni hpyen yen ladaw na wa ai hte malu masha yak wa ai hte nga shara mayak nga wa ai lam hpyen yen masha ni kawn chye lu ai.

Shwegu ginra hta hpyen yen nga ai mung masha ni gaw Manmaw, Manje, Nmawk hkan na mung masha ni koi yen ai shara rai nna Shwegu muklum na hpunggyi jawng, Nawku jawng zawn re ai shara 13 hte jinghku nta hkan sha n-ga nta shap na nga taw ai ni re hpe chye lu ai.

Rai tim mung hpungyi jawng hte Nawku jawng hkan nga ai ni gaw lam amyu myu a majaw nga shara htawt ra nna nta shap nga ai ni mung gumhpraw mayak manghkang hkrum wa ai majaw hpyen yen ni gaw nga shara yak wa ai lam nga wa ai lam rai nga ai.

Nga shara sha n-ga hpyen yen ladaw na wa nna ja gumhpraw tam ai hte seng ai mayak ni malu masha ni hte tsi mawan ni yak wa ai nga tsun ai re.

Shwegu ginjaw de koi yen nga ai hpyen yen ni yawng pawng yang nta htinggaw (1747) kawn masha marai (6475) du hkra nga ai lam hpe mung chye lu ai.

Shiga - Htu Seng