Sumpra Bum Ginra Kata Yu Li Hku Grai Sawng Taw Ai Lam

Pajau Media

August 26, 2025

Jinghpaw Mung Sumpra Bum, Putao lam mayan na mare kahtawng hkan na Mung masha ni a Yi Nai Mam ni hpe Yu sha jahten ai lam grai sawng ai nga nna ginra masha langai tsun ai.

"N Sha Yang, Hkin Du Yang mare masha ni a Bum Yi ni hpe Yu sha jahten ai, Mam ni yawng ya gaw N-gu tum pyi n tai shi ai, maning gaw dai ginra hta Kawa hpun ni asi si ai, dai Kawa hpun ni asi si ai hte Yu bai du wa sai" nga nna tsun ai re.

Yu ni gaw lai wa sai July shata htum wa maga kaw nna du wa ai re hte hkai n mai yaw jahten ai re lam chye lu ai.

Mung masa gaw n pyaw ai hta n-gu manu ni mung grai tsaw rawt nga ai lapran hkai da ai Bum Yi hkan Yu li bai du ai majaw malu masha grai yak wa na hpe grai myit tsang nga ma ai re.

"Ya na mung masa n pyaw ai hta n-gu manu ni mung grai rawt, galaw da ai Bum Yi hkan Yu li bai du, gara hku tawt lai ra ai hpan kun" nga nna ginra masha matut tsun ai re.

Yu Li du ai shara ni gaw Putao-Myitkyina mawdaw lam hte Mali Hka makau mayan dingyang na Bum Yi Hkai Sun ni hta rai nna Hpung Ngai Yang Hpyen yen Mung masha ni galaw sha ai Yi Hkan mung Yu sha jahten ai lam chye lu ai.

Ginra masha ni tsun ai hta Sumpra Bum ginra hte kaga ginra n kau hta lai wa sai shaning hkan mung Yu sha ai raitim nau n sawng ai. Dai ning gaw Shu Dan la na pyi n nga hkra sha jahten kau ai lam chye lu ai.

Shiga - Zau