Sumpyi Yang Ginra Wa Dat Mare Kaw Na La Ni Yawng Hpe Myen Hpyen Dap Masha Ni Kawn Hpyen Ninggang Shatai Rim Woi Ai Lam Nga

Pajau Media Channel

13rd May, 2024

Sumpra Bum hpe zing madu ai hpang grau nna dai ginra mayan hta hpyen masa shaja hkat nga ai masa re hte Sumpyi Yang Wa Dat mare kaw na amyu shadang ni yawng hpe myen hpyen dap gaw May (11) ya shani hpyen ninggang shatai rim woi mat ai lam nga ai re hte lani mi din ai hpang bai dat ya ai lam ginra masha ni tsun ai kaw na chye lu ai.

Myen hpyen hpung ni gaw Sumpyi Yang Wa Dat mare de May (11) ya shani kajawng kaja du shang wa nna dai mare kaw nna la re ai ni yawng hpe rim woi mat ai lam ginra masha langai tsun ai. “Wa dat mare n du shi ai shawng shani kaw na hkrun lam ntsa kaw gasat gala byin ai hpang Myen hpyen dap hpyen hpung ni gaw Wa Dat mare de du shang wa ai. Dai mare kaw lana mi yup la na hpang shani gaw mare masha amyu shadang ni hpe atik anang rim woi mat ai. Lani mi din ai hpang bai lawt wa sai” nga nna ginra masha tsun ai.

Myen hpyen dap Hk.L.Y (45) hte Putao P.T.Ts pawng hpawng hpung ni Sumpra Bum myo hpe dat sum kau ai hpang May ( ya daram kaw nna kalang bai hpyen n-gun jat hpyen shamu shamawt ai lam ni grai galaw wa ai re. May (10) ya shani hta mung Putao maga kaw nna Sumpra Bum maga de htu shadut lung wa ai myen hpyen dap n-gun (100) jan lawm ai hpung ni hpe KIA, KPDF pawng hpawng hpung ni kawn Sumpyi Yang ginra hkrun lam ntsa kaw htim gasat majan byin ai lam nga ai re hpe mung chye lu ai.

Sumpyi Yang ginra Wa Dat mare gaw mung masha htinggaw (14) shanu nga ai Myitkyina-Putao hkrun lam ntsa kaw na mare kahtawng langai re. Ya aten gasat gala majan masa a majaw hkrun lam hpe gan pat tawn da ai re hpe mung chye lu ai.

Shiga - Mali Hku