Sumpyi Yang Hpyen Yen Mung Masha Ni Hta Tsi Mawan Hte Malu Masha Karum Ningtum Ra Kadawn Nga

Pajau Media

April 21, 2025

Gasat gala majan a majaw Sumpyi Yang mare hte makau mayan hkan na Mung masha ni hpyen koi yen wa ai laning mi hkawt du wa sai hte ya aten Lanam ladaw laman malu masha tsi mawan karum ningtum ra kadawn nga ai lam chye lu ai.

Lanam ladaw shang wa sai re majaw hkawm sa hkawm wa hkrun lam yak hkak ai sha n-ga hpyen masa lam amyu myu a majaw malu masha, tsi mawan ni, Ma ni jai lang na jawng lang arung arai ni kaw na hkawt yak hkak wa mai ai majaw myit tsang ai lam hpyen yen dabang lithkam tsun ai re.

“Ya aten hpyen yen karum ningtum ni mung law malawng dawm mat sai. Maning gaw shaning n nan daw shinggan uhpung uhpawng ni hte makam masham uhpung uhpawng ni hku nna karum jaw ai daram gaw karum ai. N dai daw de karum ai lam dawm sai re majaw Lanam ladaw gaw du wa, hkyen lajang mahkawng da ai lam gaw n nga nna malu masha, tsi mawan, Mu Ga, ma ni lang na matu hpaji lam hte seng ai arung arai ni kaw na hkawt grai ra ahkyak taw nga ai,” nga nna tsun ai re.

Hpyen yen mung masha ni gaw bum yi hkyen nga ai raitim hpyen masa grau shuk shanut wa na hpe myit tsang nga ma ai re. Hpyen yen ni hpe karum ai hpung ni mung law malawng dawm wa sai re majaw Shanglawt Uphkang Gai Wang kata na Mung masha ni law malawng gaw buga de wa nga magang sai re.

Raitim Sumpyi Yang ginra mayan na Mung masha ni gaw Sumpyi Yang mare kaw nan Myen hpyen dap shara la nga ai majaw buga de wa na matu n mai byin ai re hpe chye lu ai. Sumpyi Yang makau mayan hkan na Mung masha 2,000 jan gaw 2024 May shata laman Sumpra Bum ginra kata byin ai gasat gala majan a majaw hpyen koi yen hkawm ai laning mi du hkyen wa sai re hte ya aten malu masha tsi mawan ni grai naw ra kadawn nga ai lam chye lu ai.

Shiga- Mali hku