Tanghpare Myen Hpyen Dap Shagyit Hta Asak 25 Kaw Nna 45 Lapran Ni Hpe Hkawm Sa Ahkang N Jaw Ai Lam

Pajau Media

July 28, 2025

Myitkyina Putao ginra hkawm sa lam Tang Hpare Myen hpyen dap shagyit hta Asak (25) kaw nna (45) ning lapran Num/La Ramma yawng hpe n shalai ai lam hkrun lam hkawm masha ni tsun ai re.

“ Asak (45) ning lahta nga ai ni hpe gaw lai shangun ai, dai n pu na ni hpe n lai shangun ai, kaga gunrai htaw ai ni, asak kaba sai gumgai dingla ni hpe mung sa shangun ai, Asak 25 kaw na 45 lapran hpe n shalai ai re” nga nna hkrun lam hkawm masha langai tsun ai re.

Tanghpare shangyit hta July praw 1 ya kaw nna Mung chying masat laja lana sawk jep ai lam galaw nna Sumpra Bum, N jang Yang, Putao Mung Chying masat lang ai ni hpe sha hkawm sa shangun ai re hpe mung chye lu ai. N dai bat laman hta gaw asak ram ai ni hpe du hkra n shalai ai lam ni nga ai hpe hkrun lam hkawm masha matut tsun ai re.

“ Shanhte gaw KIA hpyen lahkawn na tsang ai majaw asak ram ai ni hpe n shalai ai masa re, n kau gaw Tanghpare shagyit kaw n lai shangun ai majaw n htang wa mat ai ni nga ai, Ma lawm ai asak 50 ning re ai Salang mung Ma hpe tawn kau da nna langai hpe hkrai lai shangun ai re, shi gaw n htang wa nna Ma hpe nta kaw bai wa sa na she hkawm shangun ai” nga nna tsun ai re.

Dai majaw Tanghpare shangyit kaw Asak ram ai ni hkawm sa hkawm wa grai yak ai rai nna Backhole Jak rai htaw shalai ni hpe mung n shalai nna Lau Ban shaga gumhpraw hta sha nga ai re hpe mung chye lu ai.

Shiga- Htu Seng