Waimaw (58) Dap Hte Ni Kahtep Dik Ai Hku Htu Shadut Htim Gasat Nga Ai Majaw Balamin Htin Mahkrai kaw Jep Joi Ai Lam Grau Laja Nga

Pajau Media

February 16, 2026

N dai laman Waimaw ginra kata na hpang jahtum ngam taw ai HK.L.Y (58) dap hpe KIA pawnghpawm hpung ni htu shadut gasat nga ai aten mung re ai hta Myitkyina-Waimaw matut da ai Balamin Htin mahkrai kaw mung lai wa lai sa jep joi ai lam grau galaw wa ai hte mahkrai shimlam hpe ninggam shatsaw galaw nga ai re lam ginra masha ni tsun ai kaw na chye lu ai.

“Lai wa lai sa lam hta mung grai jep ai lu, dai hpawt hkying 6 jan daram kaw mahkrai kaw masha kadai hpe n shalai shi ai, mawdaw cycle da grai chyat ai, galoi shalai na kun ngu na Min 15 daram la yu tim n shalai ai majaw n htang wa mat sai gaw, lai wa lai sa n kau tsun ai gaw mahkrai kaw shana aten mahkrai pat ai hte bawm hkam da na jahpawt re yang bai jasan kau kau di ai nga tsun ai” nga nna mung tsun nga ma ai re.

Myen hpyen dap gaw Waimaw hpyen man maga de majan laja wa ai hte mahkrai sin masha n-gun mung jat bang da ai sha n-ga Waimaw hpyen man maga de mung hpyen n-gun jat bang nga dingyang re. Ginra masha ni tsun ai hta Waimaw de majan laja wa ai majaw nahkrai shimlam hpe ninggam shatsaw galaw wa ai re nga nna mung tsun nga ma ai re.

Mahkrai kaw magam dap shagu de na ni sin ai re majaw lai wa lai sa mawdaw ni hpe jep joi ai lam ni laja lana galaw ai sha n-ga gumhpraw hta sha ai lam mung langai hpe jaw ngut yang langai bai sa hpyi hpyi re ai majaw mung masha ni kaw na mya la ai masa hku she byin nga ai nga nna mawdaw la ni tsun dinglun nga ma ai re.

Ya aten KIA pawnghpawm hpung ni gaw lai wa sai shaning December daram du hkra gaw Waimaw Lamyang hkan du hkra shara la maden la lu ai hpang htu shadut wa ai Myen hpyen dap ni hpe hkap shingla gasat ai kaw nna ya aten gaw Waimaw (58) dap hte ni kahtep dik ai hku htu shadut htim gasat taw sai re hpe mung chye lu ai.

Ginra salang ni maram da ai hta KIA pawnghpawm hpung ni gaw Waimaw ginra hpe lawan ladan lu zing na matu hpang jahtum ngam taw ai (58) hpe htim gasat hpang nga sai re majaw mung masha ni hpyen masa grai sadi maja ra taw sai lam, yen ang yang lawan ladan yen yang kaja ai lam tsun nga ma ai re hpe mung chye lu ai.

Shiga – Pyilan U