Waimaw Ginra Kata Hta Hpyen Masa Matut Shaja Hkat nga

Pajau Media

9 August 2025

Jinghpaw Mung Ginra kata Majan masa gaw lani hte lani shaja hkat nga ai hta August 8 ya shana kaw nna Waimaw Wuyan Ginra maga de sinat kaba gap n sen ni matut manoi na nga ai lam chye lu ai.

August 9 ya Hkying 1:40 aten daram kaw nna mung Sinat kaji, kaba n sen matut manoi ngoi gara nga dingyang re. Dai ginra de nbungli bawm wa jahkrat ai lam, Sinat kaba gap bun ai n sen gaw Mai Na kaw nna asan sha na lu ai re majaw ginra masha ni grai myit tsang nga ma ai re.

Shawng lam shi sawk ni tsun ai hta Waimaw, Kanpaiti ginra hpe myen hpyen dap bai lu la hkra galaw wa ai hte marang htu ai aten hkan gaw lagaw lam hpyen htu ai sha n-ga Lak nak kaba gap ai lam, jan mai ai shani hkan gaw nbungli bawm wa jahkrat bun ai lam dingyang galaw nga ai re hpe chye lu ai.

Mung masa maram masam nga ai ni tsun ai hta myen mungdan Ra lata poi ni wa sai re majaw Waimaw Ginra hpe zing madu kau nna Ra lata poi atsawm lu galaw hkra ngu ai masing hte htu shadut htim gasat ai re lam tsun maram nga ma ai re.

Hkawm wa hkawm sa lam mung ya aten Mai Na Nang Zaw Lam Hku sha Laiza de hkawm sa hkawm wa galaw nga ai re majaw gasat gala byin ai masa hta hkan nna koi yen let hkawm sa ra taw ai masa re hpe mung chye lu ai.

shiga -Pyilan U