Waimaw Hpyen Man Maga De Myen Hpyen Dap Laknak Kaba Gap Ai Hta Mung Masha Dum Nta Hten Za Ai lam

Pajau Media

December 17.2025

Jinghpaw Mung Waimaw hpyen man maga de Myen Hpyen Dap gaw laknak kaba gap ai lam, drone bawm jahkrat ai lam ni shani shagu ngu na daram galaw nga ai re hpe chye lu ai.

Waimaw ginra kata hta gasat gala majan a majaw hpyen koi wa ai hpyen yen mung masha law law shanu nga ai ginra mung re ai hta Myen Hpyen Dap kawn ya na zawn laknak kaba hkrup mara gap sharu bun ai lam ni galaw ai majaw hpyen koi yen mung masha ni majan masa grau laja wa na hpe mung myit tsang nga ma ai re.

Lai wa sai December 15 ya jahpawt daw maga mung M.P.Hk. kawn laknak kaba 10 jan lang Waimaw Nawng Si Paw maga de gap bun ai hta nawku jawng hte mung masha dum n ta hten za mat ai lam ni nga ai re lam dai ginra de lai hkawm ai mung masha langai tsun dan ai kaw na chye lu ai.

 Mungdan ting ra lata poi galaw na lam hte seng nna grai shajin nga ai aten raitim Jinghpaw Mung kata Gasat gala majan masa gaw zim ai lam n nga, grau laja wa ai re hte Jinghpaw Mung kata december praw 8 kaw na 14 ya laman hta gasat gala majan 48 lang byin ai re hpe chye lu ai.

Bat mi hte bat mi gasat gala majan masa hpe yu maram yang majan grau laja wa ai hpe mu mada lu ai re. December 1 kaw na 7 ya du hkra bat mi laman hta mung gasat gala majan 15 lang byin ai re hte ra lata poi ni wa magang Myen Hpyen Dap gaw hpyen shamu ai lam grau galaw wa ai majaw KIA pawng Hpawm hpung ni hte majan jahkring hkring byin ai re.

KIA Masat 2 Dap Ba Ginra de Mung Myen Hpyen Dap, Min Ze Thant P.T.Ts pawng hpawm hpung ni hpyen shamu ai lam grai galaw wa ai majaw ya aten hpyen masa grai shaja hkat nga ai masa re hpe mung chye lu ai.

Shiga: PyilanU