Waimaw Lamyang De Hpyen Masa Shaja Hkat Ai Hte Myitkyina Maga Kawn Shana Shagu Lak Nak Kaba Gap Ai Lam

Pajau Media

May 26.2025

Waimaw Lamyang mare makau hta KIA hte Myen hpyen dap hpung ni gasat gala majan laja nga dingyang re lam chye lu ai.

May 23 ya kaw nna Lamyang mare maga de Myen hpyen dap n-gun kaba hte kalang bai htu shadut shamu shamawt wa ai majaw gasat gala byin ai rai nna Myitkyina maga kaw nna Lamyang mare de Drone, Laknak kaba ni hte htu shadut htim gasat nga dingyang re lam chye lu ai.

Ginra masha langai tsun ai hta May 24 ya du hkra Wai Maw Lamyang mare maga de gasat gala majan laja nna Myitkyina maga kawn mung laknak kaba ni shana shagu gasat nga ai lam tsun ai.

“ Myitkyina maga kaw nna Lak nak kaba n sen ni matut manoi gap nga ai, shana shagu re, ya gaw Myitkyina waimaw Balamin tin mahkrai kaw mung dingyang na jep ai, sadi let sha hkawm sa ra ai” nga nna tsun ai.

May 21 ya shani kaw nna Myitkyina Muklum kata Myen hpyen dap ni jep joi ai lam grau galaw wa ai rai nna Hkawm sa hkawm wa mung masha ni Ntsen nhten ai ni hpe hkap jahkring jep joi ai lam galaw nga ai re.

ya aten Hpakant ginra Nam Ting mare makau hta mung gasat gala majan matut manoi byin nga nna Myitkyina Hpakant sa lam hta hpyen masa shaja hkat nga dingyang re hpe mung chye lu ai.

shiga- Htu Seng