Waimaw Lamyang, Hkat Cho, Da Jang Ginra De Shani Shagu Majan Laja Nga Ai Lam

Pajau Media

October 6.2025

Myen hpyen dap gaw Waimaw Lamyang ginra de Myitkyina maga kaw na Laknak kaba gap ai lam, Drone bawm wa jahkrat ai lam ni shawng galaw ai hpang she Lagaw lam htu shadut htim gasat nga ai majaw shani shagu gasat gala majan laja nga ai lam chye lu ai.

Waimaw Lamyang ginra gasat gala majan gaw bai hkring dat bai gasat dat re taw ai masa re hte October praw 5 ya shani du hkra gasat gala majan laja nga dingyang re.October Praw laman hta gasat gala byin ai gaw lani hte lani majan pa hte grai gahtep ai hkan du wa ai zawn Sinat kaji n sen ni grai na lu ai nga nna Maina ginra masha langai tsun ai re.

"Shawoi gaw Sinat kaba n sen hta lai na Sinat kaji gap ai gaw nau n na ai, October Praw 3 ya shana daw hkying 7 daram kaw na Sinat kaba n sen ngoi ai hpang Sinat kaji n sen ni matut manoi na lu ai, n sen hpe madat yang Maina hte pyi grai ni taw zawn, Nawng Hkyi Jam Ga de rai na masa nga ai, majan gaw shani shagu re, na lu ai shiga ni gaw Ra lata poi n galaw shi ai laman Waimaw 58 bai htim na nga mung na ai" nga nna ginra masha langai tsun ai.

Waimaw Lamyang ginra hpe lai wa sai August shata daram kaw nna Myen hpyen dap P.T.Ts pawng hpawm hpung ni gaw htu shadut majan baw ai re hte Kanpaiti, Pang Wa ginra hpe htim gasat zing madu la lu na matu Waimaw Lamyang ginra hpe htu shadut gasat nga ai re lam Hpyen masa maram masam nga ai ni tsun ai re.

September 29 kaw na October 5 ya bat mi laman Jinghpaw Mung kata Manmaw, Waimaw, Hpakant ginra hta gasat gala majan (5)lang byin ai lam KIA shiga hta tang madun da ai.

Grau nna Manmaw ginra de gaw Ga lam htu shada gap gasat ai hta Nbungli bawm, Drone Bawm, Laknak kaba gap ai lam ni grau laja nga ai re hte gasat gala majan gaw matut manoi byin nga dingyang re lam shawng lam shi sawk ni tsun ai kaw na chye lu ai.

Shiga - Pyilan U