Waimaw Lamyang hkawm sa lam hpe aten n masat pat kau ai lam

Pajau Media

July 17, 2025

N dai laman waimaw ginra kata hpyen masa grai shaja hkat wa ai majaw Waimaw Mai Na, Wa Shawng Deng (9), Nang Zaw Yang, Lamyang hkawm sa lam hpe July 16 ya kaw nna Shang Lawt maga kawn aten n masat pat kau sai lam tsun n dau da ai re hpe chye lu ai.

Waimaw Wuyan Lam kaba hpe Myen hpyen dap pat kau ai hpang kaw nna Mung masha ni madung lai hkawm nga ai lam hpe ya aten na mung masa hta lai wa lai sa Mung masha ni a shimlam hpe myit tau nna aten n masat pat kau ai re lam Lit nga ai Salang ni kawn tsun da ai re.

Waimaw ginra de gasat gala majan laja wa ai hta Hpyen koi yen Mung masha ni law malawng gaw buga de wa magang nna arai htaw lahka nga ai aten hta hkrun lam pat ai majaw yak gaw yak mat ai, raitim hpyen masa tsang ra ai masa re majaw pat kau ai re nga nna Mung masha langai tsun ai.

“ Dai Lam gaw mi kaw na mung gasat gala byin ai ten gan pat dat, bai lai dat re ai gaw rai nga ai, Wai Maw lam kaba pat mat ai hpang n dai lam hpe madung lai ai re, maga mi hku nga yang lam dingyang lahkawng maga kaw na ni shagyit dung Jep joi ai gumhpaw hta ai grai law gaw, Mai Na camp makau de pyi du mat ai, ya pat ai kade gaw n na na kun ngu mung shadu ai law, n dai lam n mai yang kaga lam langai gaw bai she n hpaw wa na i ” nga nna Mai Na kaw shanu nga ai Mung masha langai tsun ai.

Myen hpyen dap gaw ya aten Waimaw Lamyang maga de shani shagu ngu na daram N bungli bawm, Drone, Lak nak kaba ni hte wa gap bun ai lam nga ai re. Myen hpyen dap gaw Jinghpaw Mung Waimaw, Manmaw ginra ni hpe kalang ta htim gasat matsing nga ai majaw hpyen n-gun lak nak n- gun ni grai jahting wa masa hpe mu ai lam mung masa hpyen masa yu maram nga ai ni tsun ai.

Manmaw ginra de mung lagaw lam htu shadut majan n nga ai raitim shani shagu Drone bawm htim gasat ai lam gaw dingyang re hte Waimaw Wuyan de mung shani shagu Lak nak kaba Drone bawm ni wa jahkrat ai majaw Mung masha law law hkawm sa nga ai lam hpe hpyen masa a majaw pat ai re lam tsun nga ma ai re hpe chye lu ai.

Shiga- Pyilan U