Waimaw Wuyan De Myen Hpyen Dap N Bungli Bawm Wa Jahkrat Ai Lam

Pajau Media

July 29.2025

Myen hpyen dap gaw Waimaw Wuyan de July 28 ya shana daw Hkying 5:00 PM aten daram hta N bungli bawm wa jahkrat kau da ai lam nga ai re hte Waimaw hkran maga de hpyen masa naw shaja hkat nga ai lam shawng lam shi sawk tsun ai kaw na chye lu ai.

“ Mana de hkying 5 daram hkan re N bungli bawm wa jahkrat ai, shani shagu re, marang htu yang gaw N bungli n sa ai tim Lagaw lam bai htu, Jan loi mi mai ai hte N bungli sa sai, n dai de majan sawng hkyen sai” nga nna shawng lam shi sawk tsun ai re.

Myen hpyen dap gaw Waimaw Kanpaiti hpe bai lu la hkra Lanam ladaw raitim marang htu ai shani hkan gaw lagaw lam htu shadut ai sha n-ga Jan mai ai hte N bungli, drone ni wa gap ai lam shani shagu galaw nga ai lam chye lu ai. N dai masa hpe yu yang 2025 shaning laman Myen hpyen dap gaw Kanpaiti ginra hpe zing madu lu hkra N-gun kaba hte htu shadut taw ai masa re nga nna mung matut tsun ai re.

“Myen ni na matsing gaw 2025 shaning laman Kanpaiti bai la hkra galaw mayu ai, hpa majaw nga yang Kanpaiti gaw Miwa jarit shagyit kaba rai nga gaw dai majaw grai htu wa sai” nga nna tsun ai .

Ya aten Jinghpaw mung ginra de Myen hpyen gaw Sanghpaw hpung ni hpe KIA pawng hpawm hpung ni lam lapran kaw hkap gap gasat ai lam ni galaw ai raitim July 29 ya shani gaw Shwegu kaw nna Manmaw maga de shamu lung wa ai lam mung na chye lu ai.

Kata lam shiga na lu ai hta Myen hpyen dap Sanghpaw hpung ni gaw n kau hpe Mali hka mayan lagaw lam hku htu lung wa hkyen ai matsing ni na lu ai hte hpang jahtum shiga masa gaw Manmaw ginra de Sanghpaw hpung ni matut mnaoi lung wa ai lam chye lu ai.

 Jinghpaw mung hta gasat gala majan gaw grau grau laja wa mai ai majaw Mung masha ni hpyen masa sadi maja let nga ra ai lam KIA maga kawn tsun sadi jaw n dau ai lam ni nga ai re hpe mung chye lu ai.

Shiga- Pyilan U