Waingmaw Ginra Kata Hkauna Mam Ni Aten Dep Nlu Dan Sharun La Ai Mayak Ni Hkrum Katut Nga

Pajau Media Channel

Waingmaw ginra Mung mare masha ni gaw Hkauna hpe madung galaw let kan-bau nga ai re hte dai ning laman bungli masha nlu ai zawn re ai mayak amyu myu a majaw ya aten du hkra Hkauna Mam ni hpe aten dep n lu dan zing la ai mayak ni hkrum katut nga ma ai re hpe mung chye lu ai.

Waingmaw Muklum ting hta Mam Sharun Jak (5) sha nga ai re majaw hkauna galaw sha masha ni yawng gaw dai hpe sha gayin nna shap lang nga ma ai re hpe mung chye lu ai. Hkauna Mam hpe aten dep n lu sharun la ai majaw Mam ni daw hten sum machyi nga ai lam hkauna galaw sha nga ai salang Awng Nan kawn ya na zawn tsun ai. “Mam hpe aten dep nlu sharun la ai majaw yawng hkraw ai, daw hten ai lam ni byin ai, Mam sharun jak tinang jai lang na aten grai la ra ai” nga tsun dan ai re.

Waingmaw ginra hta dai ning laman Hkauna hta madung jai lang nga ai jak ni mung shawoi shaning na daram n law mat ai majaw nga ai Jak hpe gashun gashe rai nna shap lang ra ai re hte Jak shap manu ni mung lani hte lani Manu hpu wa ai majaw grai yak hkak wa ai re lam Waimaw ginra Hkauna E-ka (20) daram galaw sha nga ai Salang Awng Nan ya na zawn tsun ai.

“Waingmaw muklum hta Mam sharun jak nau n nga ai, dai hpe lang na matu Jau tau kaw nna shap lang na lam shana da ra ai, nre yang n lu lang ai”

Jak shap manu ni mung lani hte lani grau grau hpu wa ai re hte E-ka mi hta Sen mi jan daram jaw ra ai masa lam ni hte seng nna Salang Hkawng Lum tsun ai hta “ lai wa sai shaning hta gaw E-ka langai kaw(80,000-85,000) manu nga ai dai ning gaw Lai wa sai November shata daram kaw nna (90,000 kaw na 95,000) lapran jaw ra ai, ya gaw (120,000 kaw na 130,000) daram tsaw lung wa ai, Jak Sau Manu ni kalang ta tsaw lung wa wa re ai majaw Jak shap manu ni hpu nga ai raitim lahkawng maga sum machyi ai lam n byin hkra mai byin ai masa hte galaw nga ai ”.

Shawoi shaning ni hkan gaw November shata htum hkan nga jang hkauna magam bungli yawng ngut kre ra ai aten re, raitim Myen Mungdan a mung masa lam shuk shanut ai hpang, galaw lu galaw sha lam ni grai yak hkak dut dang wa ai sha n-ga Gunrai manu hte Jak sau manu ni lani hte lani tsaw lung wa ai majaw yak hkak dut dang ai lam grau law wa ai hte ya na zawn hkauna magam bungli hpe aten dep nlu shangut la ai mayak ni a majaw Hkauna galaw sha masha ni hta sum machyi lam ni byin hkrum nga ai re hpe mung chye lu ai.