Waingmaw Ginra Nga Shagyit Ni Hta Hkawm Sa Hkawm Wa Laja Lana Sawk Jep Ai Majaw Mung Masha Ni Hkrit Tsang Nga Ma Ai Lam

Pajau Media Channel

N dai laman Waingmaw ginra kata nga ai shagyit ni hkan mung masha ni hpe hkawm sa hkawm wa sawk jep ai lam laja lana galaw wa ai majaw mung masha ni lai hkawm na matu grai myit tsang nga ma ai re lam ginra masha ni tsun ai kawn chye lu ai.

Lai wa sai December (21) ya shana daw hta Balaminhtin Pawng hpawm shagyit kaba hpe mying n chye lak nak lang hpung ni kawn dingsa gasat hkrum ai hpang kaw nna ya aten du hkra Balaminhtin pawnghpawm shagyit hte Waingmaw ginra mayan na shagyit ni hta lai wa lai sa mung masha ni hpe mungchying masat jep chyoi ai lam, cycle tool box hpaw jep ai lam, gara de sa na wa ai, gara sa hkyen ai lam ni san jep ai sha n-ga shagyit du hkyen yang Pe (50) grup yin kawn cycle ganawng lam hkawm shagun ai zawn re ai ni dingyang galaw nga ai re hpe mung chye lu ai.

Sawk jep hkrum ai mung masha langai kawn tsun ai hta “Nta masha ni hte rau mawdaw hte Myitkyina kaw na gat mari let wa shaloi pawnghpawm shagyit kaw jep chyoi ai lam nga ai, mawdaw kaw asak kaji ai ma lahkawng mung lawm ai re majaw ma ni hpe lama ma galaw dat ya na hpe grai hkrit tsang ra taw ai ” nga nna tsun dan ai re.

Yi galaw sha ai mung masha ni yi sa yi wa na matu pyi tsang ra ai madang re hte yi kaw nna Waingmaw de bai n htang wa ai lam Aung Mye (1) kaw dap Jung nga ai P.T.Ts hpung ni a shagyit hta mung sawk jep hkrum ai re nga nna salang langai mung tsun ai re. Ya na zawn laja lana sawk jep ai lam ni a majaw hkawm sa hkawm wa a matu mung masha ni gaw grai myit hkyi lit li nga ai hte galoi mung myit tsang let sha hkawm sa ra nga ai lam hpe mung masha ni tsun shana wa ai kawn Lay Phye kahtap tang madun da ai.

Shiga - Lay Pyay