World Environment Day Hta Jinghpaw Mung Kata Shingra Makau Grupyin Htenza Lam Law Wa Ai Lam Shingra Tara Makau Grupyin Makawp Maga Hpung Ni Ndau

Pajau media

June 5.2025

Jinghpaw mung kata shingra makau grupyin makawp maga Policy tang du ai lam n nga ai majaw shani shagu shingra makau grupyin hten za lam law wa ai re lam Jinghpaw mung shingra tara makau grupyin makawp maga hpung ni kawn June 5 ya shani World Environment Day hta n dau laika shapraw da ai re.

Tsa Pan (21) aten hta shingra makau grupyin gaw sawng dik ai masa de du nga ai sha n-ga anhte shanu nga ai ginra ni mung shingra hpyen a jahkrit shama ai lam byin hkrum nga sai re hpe mung chye lu ai.

Shingra tara makau gurpyin hpe makawp maga lam n nga ai majaw hpun shaw ai lam, ga sau htu shaw ai lam, lung seng, ja htu ai lam ni hpe ladu lai galaw nga ai majaw hka kaba, ga gyi ru ai lam, du hkra ladaw galai shai ai lam ni lani hte lani sawng wa ai majaw mung masha asak si sum, hkala hkrum ai lam, dum nta hten za ai lam ni hkrum sha nga ai re.

Mali Zup ginra masha amyu shayi langai kawn mung ya aten jinghpaw mung kata byin nga ai shingra gahtet shadang tsaw ai lam, tara n shang ja htu ai lam, ga sau htu shawng ai lam law wa ai majaw shingra maka hten za wa ai re lam tsun ai re.

Shingra makau grupyin makawp maga Policy hpe tang du hkra masat jahkrat hkan nang hkan sa ai lam n nga yang du wa na aten ladaw ni hta anhte ginra a matu grai myit tsang hpa re. Dai majaw shingra makawp maga lam hpe gara uhpung uhpawng n nga hkum ding dek pawng hpawm galaw sa wa na matu ra ahkyak ai lam KEG kawn n dau da ai re.

Dai sha n-ga June 5 ya shani hpe World Environment Day masat n htoi lamang hpe mungkan ting hta galaw nga ai re hte dai ning na matu Lashum Ga hku nna "ပလတ်စတစ်ညစ်ညမ်းမှုကို တွန်းလှန်၊ အာဏာရှင်စနစ်ကို မြေလှန်" ngu ai ga baw hte shingra makawp maga lam hte seng nna hkaw tsun ningmu jahpaw ai lam ni hpe mungkan ting hta galaw nga ai re hpe mung chye lu ai.

Shiga- Htu Seng