Wunpawng Mungdan Shanglawt Asuya Uphkang Ginra Hta Nanghpam Pat Jasan Bungli Hpe Dingyang Galaw Nga

Pajau Media

June 18, 2025

Jinghpaw Mung KIO uphkang ginra kata Ka-ni nanghpam Pat Jasan (PJS) bungli ni hpe dingyang galaw nga ai hta May shata laman Ka-ni lu sha, dut hpaga galaw ai lam shiga lu ai hte bungli shang ai hta Ka-ni dut sha, lu sha masha marai 28 hpe Ka- ni nang hpam rung arai hte hpawn lu rim ai lam KIA shiga kaw na chye lu ai.

KIO uphkang ai ginra kata May shata laman tinang uphkang ai ginra kata PJS bungli shang ai hta dut sha lu sha ai masha rim ai hta Ka-ni hpraw Penicillin Palin 2, Ya Ma Tawng 2,158, Tawng 200 rawng ai htuk kaba 26 ka-ni hpraw Pinpe galu gaw 100, Pipe kaji gaw 27 ni hte ka-ni lu yaang lang ai arung arai ni hte hpawn lu rim ai lam chye lu ai.

 Lu rim da sai masha ni hte ka-ni nanghpam arung arai ni hpe seng ang ai asuya dap de ap kau sai lam chye lu ai. PJS bungli shang ai aten lu rim zing la lu ai ka-ni nanghpam ni hpe Kachin Anti Drug Day masat n htoi hta shawa masha man kaw wan nat jahten kau ai lam ni galaw ai re.

Lai wa sai 2024 April shata kaw nna buga ginra PJS hpung hpaw let KIO PJS Komiti ni woi awn ai kata buga hpung kata PJS bungli hpe n-gun dat galaw lai wa sai raitim Myen mungdan kata covid ana zinli kap bra wa ai masa hte 2021 myen hpyen dap daru magam zing ai hpang PJS bungli hpe tang du hkra n lu galaw nna hkring ra mat ai madang byin ai re hpe mung chye lu ai.

Ya aten KIA htu shadut majan hpang ai 2024 March 7 ya hpang daw de Jinghpaw mung kata nga ai Myen hpyen dap shara law malawng hpe padang dip zing madu la lu sai re majaw zing madu ai shara, mare kahtawng ni hkan du hkra Ka-ni nanghpam PJS bungli hpe jahkrat da ai Masing kata n-gun dat galaw wa ai re hpe mung chye lu ai.

KIO Uphkang ginra kata hta PJS Komiti ni hpaw nna n-gun dat galaw hta rim ahkyak ai lam, Mung masha hpe ningmu jahpaw ai lam ni hpe mung ja ja galaw nga ai re hpe chye lu ai. Dai sha n-ga KIO uphkang ginra rai nga ai Miwa jarit Sadung, Kanpaiti, Chihpwi, Pang wa, Lagum, Hpimaw, Gangfang ginra kata hta mung Buga ginra masha ni tang shawn wa ai hte maren ka-ni dawn dabang hpaw nna ya aten masha marai 500 grup yin dawn jasan hkam la nga ai re lam mung chye lu ai.

Shiga- Pyilan U