Y-12 Nbungli Bawm Wa Jahkrat Ai Majaw Lawng Hkang Mare Kaw Na Amyu Shayi Langai Asak Si Sum Nna Ma Langai Hkra Hkala Ai Lam

Pajau Media

November 12.2025

Hpakant Ginra Myen hpyen dap Nbungli bawm gap gasat ai majaw Lawng Hkang kaw na amyu shayi langai asak si sum nna Ma kaji langai hkala hkrum ai lam chye lu ai.

"Lawng Hkang maga de November 11 ya shana daw hkying 2 aten daram hta n sen ni na taw ai, anhte na baw n tsa hkan sha pyen gawai ai dai Nbungli sha rai na shadu ai, Nbungli Bawm na majaw amyu shayi langai asak si sum nna Ma langai hkala hkrum ai" nga nna Hpakant Ginra masha tsun ai.

Myen hpyen dap gaw shani hkying 1 jan aten daram hta Y-12 Nbungli pyen gawai nna Taw Maw, Kahtan Yang hte Kin Si maga de yawm htum bawm 10 lang n yawm wa jahkrat kau da ai re.

Dai Y-12 Nbungli bawm wa jahkrat ai majaw amyu shayi langai asak si sum nna Ma kaji hkala hkrum ai re hpe chye lu ai.

KIA pawng hpawm hpung ni hte gasat gala byin ai Lawng Hkang sha n-ga KIA dung 6 ginra de mung Nbungli bawm grai lang wa gap sharu bun ai lam chye lu ai.

Hpakant ginra gaw lai wa sai October shata laman hta loi zim ai raitim November 9 ya kaw nna hpyen shamu lam laja lana galaw wa ai majaw majan bai byin wa ai re.

Myen hpyen dap gaw Hpakant ginra hta Ra lata poi galaw na matu Hpyen n-gun htu shadut ai lam matut manoi galaw nga ai re hpe chye lu ai.

Shiga - Zau,Hpring