Ya Aten Nam Kata Hkan Mai Byin Ai Hku Koi Yen Nga Ai Mung Masha Ni Lanam Ladaw Hta Grau Yak Hkak Wa Na Hpe Myit Tsang Nga

Pajau Media

May 8, 2025

Myen hpyen dap gaw gap hkat jahkring da ai raitim Jinghpaw mung kata de hpyen n-gun grai jat bang nga ai hte nbungli hte gap gasat ai lam grai galaw wa ai majaw ya aten nam hkan hpyen koi yen nga ai Mung masha ni lani hte lani law jat nga ai re.

Jinghpaw Mung kata Hpakant lam, Danai Lido lam mayan hkan gasat gala majan byin ai hte hpyen masa grai shaja hkat nga ai re majaw Wa Ra Zup ginra masha hkying lam gaw nam hkan shara garan nna hpyen koi yen ai shata lahkawng daram rai wa sai re hpe mung chye lu ai.

Ya aten nam kaw mai byin ai hku tawt lai nga ai raitim lanam ladaw du shang wa yang malu masha, lu hka, tsi mawan sha n ga lam magup hta grai yak hkak wa mai ai majaw Mung masha ni grai myit tsang nga ma ai re. Hpyen koi yen mung masha ni lanam ladaw n du shi yang buga de wa nga lu hkra seng ang ai ni kawn mahkrun hpaw ya na hpe mung myit mada nga ma ai re.

Shawng daw de hta Wa Ra Zup mare kata Myen hpyen dap npu Min Ze Tan P.T.Ts hpung ni shara jahkrat wa nga ai lam n nga ai raitim March praw kaw nna KIA pawng hpawm hpung ni Wa Ra Zup mare pru shang shara hkan wa dung ai hpang shada hpyen masa shaja hkat wa ai re hpe chye lu ai.

Hpyen masa shaja hkat ai kade n na ai hpang April 4 ya kaw nna gaw mare kata kaw P.T.Ts ni shara la nga ai gaw ya aten du hkra re hpe chye lu ai. Mung masha ni koi yen kau da ai mare kata hta P.T.Ts hpung ni kam ai hku shamu shamwat nna Mung masha dum nta wan nat jahten ai lam ni nga ai lam na lu ai raitim nta kade hkru lawm mat ai hpe gaw tup hkrak n lu tsun shi ai nga nna ginra masha ni tsun ai kaw na chye lu ai.

Shiga- Pyilan U