Ya Aten Rawt Malan Ginra Ni Hta N Tsa Hpyen Grai Sadi Maja Ra Ai Lam

Pajau Media

September 25, 2025

Ya aten Myen hpyen dap gaw n tsa lam hku nna htim gasat ai lam hpe madung galaw wa ai re hte KIA Dap Ba Ginra hkan mung gasat gala n nga tim Nbungli bawm jahkrat bun ai lam galaw nga ai re hpe chye lu ai.

KIA dap 2 ginra kata September 25 ya jahpawt daw Hkying 9:50 AM aten daram hta Masat 45 dap dung ginra de Myitkyina kaw na lung wa ai Y12 Nbungli Bawm wa jahkrat bun ai lam hpe chye lu ai.

Y 12 Nbungli wa jahkrat ai hta 120 MM ngu maram lu ai bawm hpan 26 lang wa jahkrat bun ai lam chye lu ai. Myen hpyen dap gaw ya aten gasat gala byin ai Jinghpaw Mung ginra hta Nbungli, Drone Laknak ni hpe madung jai lang gap gasat nga ai re.

Grau nna gaw gasat gala n byin ai ginra hkan du hkra masing nga nga Nbungli bawm jahkrat gasat ai gaw Mung masha hpe masat shingte tawn gasat ai lam re nga nna Mung masa maram masam nga ai ni tsun ai re.

Ya aten Jinghpaw Mung Hpakant Ginra kata hta mung Laknak kaba, Drone bawm shani shagu gap ai majaw Mung masha asak si sum ai shani shagu nga ai re. Dai zawn sha Waimaw Lamyang de mung lagaw lam htu shadut gap ai lam, Myitkyina kaw na mung Laknak kaba gap garum ai lam galaw nga dingyang re lam shawng lam shi sawk ni tsun ai re.

Shiga- Pyilan U