Yu Li A Majaw Bum Yi Galaw Sha Ai Masha Ni Kan Bau Bungli A Matu Myit Tsang Nga Ai Lam

Pajau Media

September 26, 2025

Putao Ginra hte Machyang Baw ginra hta Yu Li a majaw Bum Yi Mam ni grai hten za hkrum ai majaw Bum Yi galaw sha masha ni kan bau bungli a matu grai myit tsang nga ma ai re.

Ya aten Machyang Baw ginra kata na Bum Yi tsa lam shadang 85% daram gaw Yu Li a majaw Hten za mat ai rai nna hkauna mam ni hpe mung jahten wa mai ai lam bum yi galaw sha masha langai tsun ai.

"Bum yi yawng ngu na daram hten za mat sai, Yi 10 kaw na 8 daram gaw kabai kau ra sai, Yu Li gaw grai sawng taw ai, Hkauna Mam ni hpe mung jahten wa mai ai. Ya pyi Mam ni n nan pru wa ai aten re, gara hku makawp maga ra na re n chye sai" nga nna tsun ai.

Putao Sumpra Bum ginra hta mung dai ning laman Bum Yi Mam ni hpe Yu grai sha jahten ai hte dai Yu ni gaw Putao Machyang Baw maga de bai du shang wa ai re lam chye lu ai.

Hkauna Mam ni hpe mung matut nna Yu ni sha jahten wa yang Putao Ginra kata N-gu Malu masha taw ai mayak ni hkrum katut wa mai ai lam Ginra masha ni myit tsang nga ma ai re hpe chye lu ai.

Shiga- Mali Hku

Photo credit to Owner