Yu Li Grai Sawng Ai Majaw Putao Machang Baw Ginra Masha Ni Bum Yi Nkau Kabai Kau Ra Ai Madang Byin Nga Ai Lam

Pajau Media

10th September, 2025.

Putao ginra kata lai wa sai 2022 daram kaw nna bum yi hkan Yu sha ai lam ni byin wa ai re hte Sumpra Bum N Jang Yang ginra hkan grau sawng ai raitim dai ning gaw Machyang Baw ginra hta bum yi n kau hpe kabai kau ra ai madang byin nga ai lam ginra masha tsun ai re.

“ Yu sha gaw sawng dik sai, shawoi shaning na hta grau ai ga re, Machang Baw bu ni gaw Yu nau sha na galaw da ai Yi pyi kabai kau ra mat ai, Yu sha ai wa Yi Hku hkyeng ai hkrai she ngam mat hkra sha kau ai, dai ning gaw Putao ginra shat lu sha grai yak na tai sai” nga nna bum yi galaw sha ai asak (60) ning re ai Putao ginra masha langai tsun ai re.

Bum yi hta lai nna kaga tam lu tam sha na mung yak ai re majaw Putao ginra masha ni gaw bum yi hpe madung kan bau bungli hku galaw sha ai re. Lai wa sai shaning hkan gaw Yu sha ai lam dai ram nsawng ai raitim du hkra ladaw a majaw mam hpun hkyeng nna shi hte shi hkraw si mat ai lam ni byin ai majaw bum yi galaw nna kan bau na matu grai yak hkak wa ai madang de du nga sai lam ginra masha tsun nga ma ai re.

Yu ni hpe gasat kau na matu adup gayet sat ai hta lai nna kaga ladat hku na n chye ai re majaw ya aten Yu li byin hkrum nga ai ginra masha ni Yu li gasat sha myit ai hte seng nna hpaji jaw ai lam mung grai ra ahkyak nga ai lam chye lu ai. Yu li byin law dik ai ginra gaw Sumpra Bum ginra, N jang Yang, Putao ginra kata na bum yi galaw sha ai mare kahtawng shagu ngu na daram hta byin hkrum nga ai re hpe mung chye lu ai.

Putao ginra hta lai wa sai 1977 hte 1990 jan ning sha n-ga 2000 ning daram du hkra Yu li tsin Yam hkam sha lai wa sai re. Yu li a majaw Mung masha ni gaw nam hkan malu masha ni, nam nai ni htu sha ra ai madang de du mat ai rai nna dai ning hkan na mung Putao ginra kata shat lu sha n lu sha mayak sawng dik madang hkrum katut wa mai ai lam ginra masha ni tsun ai kaw na chye lu ai.

Shiga - Pyilan U